Hargeysa (Geeska) – Madaxweyne ku-xigeenka Somaliland, ahna Guddoomiyaha Guddiga ka hor-tagga Xanuunka Covid_19, Md. Cabdiraxmaan Cabdillaahi Ismaaciil (Saylici), ayaa laga helay xanuunka Covid_19.
Madaxweyne ku-xigeenka Somaliland oo Xalay qoraal ku baahiyey barta uu ku leeyahay Twitter-ka, ayuu ku sheegay inuu saddexdii Maalmood ee u dambeeyay la tacaalayey xanuunka Covid_19, sidaasi darteed loo baahan yahay in Dadweynuhu raacaan Tilmaamaha Wasaaradda Caafimaadka.
Madaxweyne ku-xigeenka ayaa qoraalkiisa oo koobaan ku yidhi “Waxaan shacbiga Somaliland la socodsiinayaa in aan la tacaalayay saddexdii cisho ee u danbeysay Xanuunka COVID-19.”
Madaxweyne ku-xigeenku wuxuu sheegay oo kale “Bulshada waxaan ku boorrinayaa in ay raacaan tilmaamaha Wasaaradda Caafimaadka, aniga iyo inta xanuusanna noo soo duceeyaan…”ayuu yidhi.
Xanuunka Covid_19 oo dunida ku soo laba-kacleeyay, ayaa faro-baas ku haya meelo Somaliland ka mid tahay.
Sabtidii waxa Wasaaradda Caafimaadka Somaliland sheegtay in geerida uu sababayo xanuunka Covid_19 ay joogto ka noqotay Somaliland.
Geeska.net/Hargeisa Office
