ADDIS ABABA — Ra’iisul Wasaaraha Itoobiya, Abiy Ahmed, ayaa si rasmi ah u shaaciyay in dalkiisu uu la wareegay wejigii koobaad ee diyaaradaha dagaalka ee casriga ah ee noocoodu yahay Su-35, kuwaas oo ay ka iibsadeen dowladda Ruushka. Sidoo kale, wuxuu tilmaamay inuu dhowaan dalkiisu heli doono nidaamka caanka ah ee difaaca gantaalaha hawada ee S-400, kaas oo qayb ka ah qorshe baladhan oo lagu xoojinayo awoodda ciidanka dalkaasi.
Abiy Ahmed oo qoraal soo dhigay barta X (horey loo oran jiray Twitter) ayaa ku tilmaamay qalabkan ciidan ee ay la soo wareegeen guul taariikhi ah iyo mid horseedi doonta in dalkan ku yaalla Geeska Afrika uu kor u qaado amnigiisa qaranka, isagoo yidhii: “Waa talaabo kor loogu qaadayo amniga qaranka, laguna hakinayo gardarro kasta oo nagaga timaada si hordhac ah.”
Garab istaagga Vladimir Putin Iyo Faahfaahinta Heshiiska
Ra’iisul Wasaaraha ayaa si gaar ah ugu mahadceliyay Madaxweynaha Ruushka Vladimir Putin, kaas oo uu sheegay inuu gacan weyn ka geystay sidii diyaaradahan Su-35 ah loogu soo wareejin lahaa Itoobiya sannad ka hor waqtigii markii hore heshiiska lagu qoray.
Sida ku cad faahfaahinta qoraalka, Itoobiya waxay guud ahaan heli doontaa 12 diyaaradood oo nooca Su-35 ah iyo afar baytari oo ah nidaamka difaaca hawada ee S-400. Inkastoo la sheegay tirada agabkan, haddana Ra’iisul Wasaaruhu kama uusan hadlin qiimaha lacageed ee heshiiskan ku kacay iyo goobaha rasmiga ah ee la dhigi doono agabka difaaca hawada.
Dhinaca kale, shirkadda rasmiga ah ee dowladda Ruushka u qaabilsan dhoofinta qalabka milatariga ee Rosoboronexport ayaa u xaqiijisay wakaaladda wararka ee Reuters in labadii diyaaradood ee ugu horreeyay ee Su-35 ah maanta lagu wareejiyay Ciidanka Cirka ee Itoobiya.
Caqabadaha Amni Ee Itoobiya Wajahayso
Heshiiskan milatari iyo hubkan casriga ah ayaa kusoo beegmaya xilli Itoobiya ay wajahayso caqabado adag oo dhanka amniga ah. Gobolka Tigray ee dhaca waqooyiga dalkaasi ayaa dib u helay iska horimaadyo dhexmaray ciidanka dowladda iyo isbahaysi mucaarad ah oo bishii hore weerar qaaday. Tani waxay dib u kicisay cabsidii dagaalkii sokeeye ee geystay khasaaraha baaxadda leh ee boqolaal kun oo qof ay ku dhinteen intii dhaxeysay sannadihii 2020 ilaa 2022.
Dagaalladii hore ee gobolkaas ka dhacay, awoodda ciidanka cirka ee Itoobiya—gaar ahaan adeegsiga ballaran ee diyaaradaha aan duuliyaha lahayn ee Drons-ka ee dibadda laga keenay—ayay ahayd kuwii beddelay jihada iyo miisaanka dagaalka, iyadoo dowladda u sahashay inay gacan sarreyso.
Dhinaca kale, dib u qaraxidda dagaalka ayaa sababtay inuu xumaado xidhiidhkii ka dhexeeyay dalalka deriska ah ee Itoobiya iyo Eritrea. Dowladda Addis Ababa ayaa ku eedeysay dalka Eritrea inuu taageero siinayo xoogaga mucaaradka ah ee la dagaallamaya, inkastoo xukuumadda Asmara ay si kulul isaga fogaysay eedeymahaas
