Dhacdooyinkii ugu waaweynaa ee ka dhacay carwada caalamiga ah ee China ayaa noqday heshiis ganacsi ku kacaya 2 milyan oo doolar, oo dhex maray mid ka mid ah maagashadayaasha Afrika ugu da’da yar iyo dawladda Shiinaha.
Macradkan caalamiga ah oo ah kii ugu horreeyey ee Shiinuhu qabto waxaa heshiiskan ku galay Diego Twahirwa oo ah 30 jir u dhashay dalka Rwanda o oleh beerta caanka ah ee Gashora, waxa aanu heshiiska la saxeexday shirkadda Kai Jiang Xian Zi Wei, si uu laga bilaabo bisha Kow iyo tobnaad ee 2018 ka, illaa bisha Shanaad ee 2019 ka busbaas qaji ugu dhoofiyo dalka Shiinaha.
Wargeyska ‘The New Times’ ee ugu caansan dalka Shiinaha, ayaa ku warramay in wiilkani bilaabay beer weyn oo la yidhaahdo Beerta Gashora, sannadkii 2015 ka, kaddib markii uu qaatay go’aan ahaa in uu iskaga tago shirkad uu ugu shaqaynayey aqoonta uu bartay oo ah injineernimada beeraha. Wiilkani si dhaqso ah uma uu bilaabin ganacsiga qajiga, laakiin markii uu bilaabay waxa uu arkay waxtarkeeda, waxa uu bilaabay in uu ku sii socdo beerista iyo kor u qaadista waxsoosaarka busbaaska qajiga loo yaqaann. “Suuq xaamiya ayaa uu haystaa noocyada kala duwan ee busbaas qajigu, soo go’itaanka dalaggiisuna waa uu ka waqti gaaban yahay qiime ahaanna ka xasiloonyahay xitaa shaaha iyo bunka” ayaa uu Twahirwa yidhi mar uu sannadkii 2017 ka sheekeeyey sababta ku riixday in uu beertiisa u beddelo mid uu qajiga ku beero.
Dalka Rwanda waxa aad loogu yaqaannaa waxsoosaarka bunka iyo shaaha, marar badan ayaanay abaalmarinno kala duwan dunida kaga kasbatay waxsoosaarkeeda bunka iyo shaaha oo tayadiisa loo bogay.
Imika wiilkan 30 jirka ah beertiisu waxa ay dhoofisaa busbaaska iyo saliidda busbaaska oo uu u dhoofiyo dalalka Ingiriiska, Maraykanka, Beljam, Faransiiska, Hindiya, Natherland, iyo Switzerland.
Korodhka xawliga sare ku socda ee dalabaadka lagu doonayo busbaaska ay soo saarto beerta Gashora, ayaa kallifay in uu Twahirwa sii ballaadhiyo dhul beereedkiisa oo uu dhowaan ku daray 160 Hektar sida lagu sheegay warbixin uu soo saaray bangiga adduunku.
Sannadkii 2017 ka dalagga busbaaska ee beertiisu waxa uu ahaa 10 Metric Ton, oo ah qaji ingagan xilli beereed kasta, waxsoosaarkaasna waxaa ka mid ahaa qaji daray ah, qajiga aadka u kulul iyo qajiga ingagagan ee loo yaqaanno qajijada Afrika, dhammaan noocyadaasna waxa uu ku soo bandhigay carwo ganacsiyeedkii caalamiga ahaa ee Shiinaha oo horraantii bishan kow iyo tobnaad ka dhacay dalka Shiinaha.
Wiilkan ayaa bishii siddeedaad ee sannadkan ku guulaystay abaal marintii sannadkan 2018 ka ee maalgashadeyaasha da’da yar ee sannadka (WEDF 2018).
