Hargeysa(Geeska)-Xafiiskada xidhiidhiyaha Qaramada Midoobay ee fadhigiisu yahay magaalada Hargeysa ayaa beeniyay warar ay warbaahinta qaarkeed baahisay oo sheegayay in xafiiska qaabilsan amniga shaqaalaha Qaramada Midoobay ee UNDSS uu qayb ku lahaa warbixin lagu dhaleeceeyay ammaanka Somaliland oo loo gudbiyay xarunta Newyork ee Qaramada Midoobay.
Xafiiskan Hargeysa degen, ayaa qoraal uu Khamiistii 4 Oktoobar, soo saaray, wuxuu ku beeniyay wararkaas, waxaanu warsaxaafadeedka Qaramada Midoobay u dhignaa sidan: “Warbaahinta maxaliga ah ee Somaliland ayaa dhawaan qortay warar lagu sheegayey in xafiiska qaabilsan aminga shaqaalaha ee UNDSS uu ka qayb-qaatay warbixin wax lagaga sheegay amniga Somaliland. Xafiiska Xidhiidhiyaha Qaramada Midoobay wuxu halkan ku caddeynayaa in xafiiska UNDSS Hargeysa aanu qorin isla markaana ka qayb qaadan warbixintaas oo la sheegay in loo gudbiyey USG UNDSS.
Shaqada Xafiiska UNDSS waa in uu hubiyo amniga iyo nabadgalyada shaqaalaha Qaramada Midoobay ee Somaliland kumana talo jiro in uu gudbiyo warbixin lid ku ah amniga Somaliland.”