Maayerka Caasimadda Oo Ka Hadlay Waddooyinka Baaqna U Diray Dadweynaha Hargeysa

0
463

Hargeysa (Geeska)- Maayarka Caasimadda Hargeysa Cabdiraxmaan Maxamuud Caydiid (Soltelko) iyo Xildhibaanno ka tirsan Golaha Deegaanka Hargeysa, ayaa  Shalay dib u  bilaabay waddo si casriya loo sameeynayo oo ay hore uga bilaabeen isgoyska jig-jiga yar illaa Kaantaroolka galbeedka u baxaysay.

Maayarka oo ka hadlaya Waddadaas iyo sida ay u dhisayaan yidhi “Maanta (Shalay) waxaanu bilownay waddadiii Kontonka Sanno lagu socon lahaa, waana waddada hor marta Madaxtooyadda horteedda, qaybta aanu bilaabayna waa qaybtii ka bilaabmaysay goladda jig-jiga yar  iillaa Kaantaroolka Galbeedna socon doonta, waxaana leeyahay dadweynaha waa inay bixiyaan cashuurta, ta labaadna ka qaybqaataan horumarka caasimadda”.

Wadadan  bilaabnay waa qaybtii ka hadhsanayd waddadiii hore ee Madaxtooyada hor maraysay ee ka soo bilaabanta Halleeya ilaa isgoyska Jig-jiga yar taas oo dadweynaha mara aad ugu raaxaystay, isla markaana ah waddo cimrigeeddu dheer tahay, waxaanay wadadani noqonaysa ilaa buurta kala jeexan oo afar killo mitir oo sanadkii hore ka hadhay, muddo toddobaad ah ku dhamaanaysay, waxa ku xiggi doonta wadadii madaarka oo iyana ka bilaabmi doonto saldhiga dhexe illaa madaarka, dadka wadooyinka hortoodda yaala waa inay ka sii guuraan sida ugu dhakhsiyaha badan”.

Dhinaca kale, waxa uu Maayarku soo kormeeray waddo cusub oo ka baxda xaafadda Siineey ee Axmed dhagax, isla markaana u gudbi doonta xaafadaha Masalaha ee degmadda Axmed Dhagax kuna xidhmi doonta xadka u dhexeeya Hargeysa iyo gobolka Awd, iyadoo halkaasi kaga xidhmi doonta wadadda tagta Balligubadle.

Xildhibaan Saleebaan Dogax oo ka mid ah golaha deegaanka ee caasimadda ayaa digniin u diray dad uu sheegay inay lacag ku so urursadaan inay wadooyinka caasimadda dhisayaan, isla markaana soo jeediyey in maamulka wadooyinka loo daba fadhiista dawladda hoose oo shaqadeeddu tahay, isla markaana wixii ay ugu darayaan ku daraan balse aanay jirin cid kaligeed wadooyinka samaynaysa.

“Gacmo wada jir bay ku gooyaan, aad baan ugu faraxanay wadooyinka caasimadda ka socda ee ay wadddo dawladda hoose, waxa jira dad qurbaha lacag kaga gurta wadooyin baanu caasimadda ka samaynay, waxaan leeyahay dadkaasi wadooyinka waxa shaqo ku leh dawladda hoose, cid kaligeed waddo iska wadda ma jirto, wixiii ay ku kaabayan dawladda hoose waa la ogol yahay laakiin maaha inay dadka lacag kaga soo urursadaan wadooyin baanu samaynaya dadkaasi waxaan u digaya digniin, sidoo kale dadka qaar baa sheegtay in biriishka Cawaale Jidhoon oo ay ku baxayso lix boqol oo kun oo dollar taas oo dawlada hoose waddo, waxaaan leeyahay dadka noocaas ku dhaqmayaa ha ka waantoobaan”ayuu yidhi xildhibaan Dogax

Maayarka Caasimadda Cabdiraxmaan Maxamuud Caydiid Soltelko, ayaa shacabka reer Axmed dhagax ugu baaqay inay ka qaybqaataan dhismayaasha wadooyinka, isla markaana cashuurta lagu leeyahay iska bixiyaan, isagoo farta ku fiiqay in degmadda Axmed dhagax tartan la galaan degmooyinka kale ee si adeegoodda  loo dhamaystiro.

Maayarka Caasimaddu sidoo kale waxa uu digniin u diray maamuladda gobolka Hawd oo uu xusay inay xadkooda ku eekaadaan, isla markaana wadadan ka soo bilaabanta xaafada Siineey ku soo xidhi doonta wadadda Balligubadle ee labadda gobol u dhexeysa, isagoo ballanqaaday inay dhankooda soo dhisayaan wadadan.

“Wadadani way sii socon doonta, waxaana leeyahay reer Axmed Dhagax yaa la idinka badin ee la tartama degmooyinka kale waa inaad kaalinta kowaad iyo labaad ee xaga cashuur bixinta ku tartantaan”ayuu yidhi Maayarka oo guubaabinaya dadweynaha kudhaqan Axmed Dhagax, waxaanu intaas ku daray “halkan aynu taaganahay dhulka galbeed ka xiga ilaa madarasadda ilaa dayrkaa ilma Cismaan Geele inta u dhexeysa  seesaskii afka la isku saary wax wadooyin ah oo loo dhex mari karaana ma jiraan maanta laga bilaabo dhulkaasi wuu xayiran yahay dadkii lahaana waa inay si dhakhso ah u yimaadaan si wadooyin looga saaro, si looga hagaajiyo qorshahoogii hore, wadooyinkii looga baneeyo, mitirka meel ka sokeysa oo Balligubadle qorsheyn karaan ama cashuur ka qaadi karan ma jirto waxaan leeyahay maamulka degmadda Balligubadle xad baa inoo dhexeeya maamul waliba xadkiisa ha ku eekaaddo”

Sidoo kale, waxa iyaguna halkaasi ka hadlay odayaasha xaafadda iyo xildhibaanadda golaha deegaanka qaarkood kuwaas oo soo dhoweeyey wadooyinkan ka scoda caasimadda.