Hargeysa (Geeska) – Guddiga doorashooyinka Qaranka Somaliland, ayaa shaaciyey wakhtiga kama dambaysta ah ee xidhmayso Qabashada Liisaska Musharraxiinta u tartamaya Goleyaasha deegaannada doorashada soo socota.
War-saxaafadeed uu ku saxeexan yahay Guddoomiyaha Guddiga doorashooyinka Cabdirashiid Maxamuud Cali (Riyo-raac) oo Shalay soo baxay ayaa lagu sheegay in 17-ka bishan ay tahay Maalinta u dambaysa ee qabashada Liisaska Musharraxiinta.
War-saxaafadeedkaasi oo soo gaadhay Wargeyska Geeska Afrika ayaa u qornaa sidan “Komiishanka doorashooyinku:- Markuu arkay:- Qodobka 84-aad, farqaddiisa 1-aad ee Xeer Lr 91/2020 oo odhanaya ‘Liiska Musharraxiinta Goleyaasha deegaannada waa in la geeyo Xafiisyada doorashada ee degmooyinka ka hor 6-da Galabnimo Maalinta 75-aad intaanay cod-bixintu dhicin, iyadoo ay dhan yihiin lifaaqyadiisa ku tilmaaman Xeerka.
Markuu arkay:- Qodobka 84-aad, farqaddiisa 3-aad Xarafka (D) ee Xeer Lr. 91/2020 oo tilmaamaya ‘Liisaska Musharraxiinta Ururka/Xisbiga waxa kale oo la soo raacinayaa Rasiidhada bixinta Deebaajiga Musharraxnimo ee Wasaaradda Maaliyadda eek u xusan Qodobka 83-aad ee Xeerkan.
Sidaa daraadeed, Komiishanka doorashooyinka Qaranku idinla socodsiinayaa.
- In Lixda Galabnimo ee Maalinta Arbacada 17 March, 2021 ay tahay Maalinta ugu dambaysa ee Qabashada Liisaska Musharraxiinta Goleyaasha deegaanka
- Liiska Musharraxiinta waa inay ku lifaaqan yihiin dhammaan shuruudaha kale iyo dhukumantiyada looga baahan yahay ee sharcigu waajibiyey oo ay ka mid tahay bixinta deebaajiga musharraxiinta ee Wasaaradda Maaliyadda.”
Geeska.net/Hargeisa Office
