Ceerigaabo(Geeska)-Shirkii muddada beelaha Habaryoonis uga socday buurta Daallo ee magaalada Ceerigaabo, ayaa shalay la soo gunaanaday.
Shirkaas waxa laga soo saaray 13 qodob oo isugu jira dhinacyada horumarinta, dhaqaalaha, siyaasadda, colaadaha Buhodle, abaaraha gobalada galbeed iyo arrimo kale. War-murtiyeedkii shirkaas laga soo saaray wuxuu u dhignaa sidan:
In jiritaanka iyo Qaranimada Somaliland tahay lama taabtaan
Aasaaskii Kamhuuriyadda Somaliland waxa uu ka dhashay Heshiis Beeleedyadii Burco iyo Boorame eek u xardhanaa Axdi Qarameedkii dhalay Dastuurka Somaliland, sidaas darteedna wadahadalo kasta oo Somaliland la gasho Somaliya waa in looga tashadaa si siman oo isku dheelitiran dhamaan beelaha Dega Somaliland. Waana inay xukuumadda hada jirtaa si balaadhan uga qayb galiso cid kasta oo xaq u leh wadahadalada socda, isla markaana ay ka baaraandegto kana fiirsato Ergooyinka ka qayb galaya wadahadalada lagana saaro mad madowga si aanay cid gaar ahi isaga maamulan Masiirka Dalka iyo Dadka
Beelaha Habar yoonis waxay ku baaqayaan in la soo af-jaro shaqaaqooyinka iyo xaal;adaha ka aloosmay Buuhoodle mid dhaqan iyo mid siyaasadeedba, lana baajiyo dhiig daata oo ka dhasha dhulka ay wada degaan dadka wada dhashay ee Seemaal oo noqotoy mid soo noq noqotay, Xukuumadda Somaliland waxa waajib ku ah inay wax ka qabato tabashooyinka muwaadiniinta degan Gobolada nabadgelyo daradu ka jirto isla markaana keeni karta dagaal.
Beelaha habar yoonis waxay diyaar u yihiin inay ka qayb qaataan daminta khilaafaadka iyo shaqaaqooyinka ka aloosan meel kasta oo ka mid ah Somaliland
Beelaha Habar yoonis waxay u soo jiidinayaan Xukuumadda jirta ee Madaxweyne Siilaanyo inay si siman oo an Eex lahayn ay uga qayb galiso Beelaha Somaliland khayraadka Dalka, Horumarinta Deegaanka, isu dheelitirka Shaqaalaha Dawladda, Ciidamadda Qalabka sida iyo jagooyinka siyaasiga ah, waana in Xukuumaddu ka xaq-soortu mashaariicda ganacsi si aanay cid gaar ahi uga faa’iidaysan khayraadka Dalka.
Beelaha Habar yoonis waxay u soo jeedinayaan Xukuumadda inay u soo jeedsato wax ka qabashada iyo Horumarinta Gobolada Sool, Sanaag iyo Oodweyne oo ay ka muuqato dayacaad farabadan oo ku saabsan kaabayaasha dhaqaalaha iyo adeegyada bulshada. xukuumadda Somaliland waxa waajib ku ah sidii looga saari lahaa Miinooyinka ku aasan qaybo ka mid ah Gobolada Dalka Somaliland oo aan laga gurin Miinadii tan iyo intii Dalka dib loogu soo noqday, waana inay u fasaxdo Hay’adaha Miino saarka si loo badbaadiyo Nafaha Dadka iyo Xoolaha aku dhaqan Deegaanadaasi
Xukuumadda Somaliland waa inay ka saarto shacabkii soo doortay haddii ay jirto ku xad gudubka Xorriyatul qawlka, isla markaana aanay Cabudhin ama aanay u cagajuglayn Saxaafadda Madaxa Banaan. Waxa kale oo xukuumadda laga rabaa inay ka iibiso garsoor madax banaan si loo helo Cadaalad loo siman yahay oo lagu wada qanco
Beelaha Habar yoonis waxay nabadgelyo kula noolaanayaan beelaha ay deriska yihiin iyo Dawlad deegaanka somalida Itoobiya, waxaanau u diyaariyeen inay iska kaashadaan Horumarinta Nabadgelyada iyo ilaalinta Deegaanka
Waxay Beelaha Habar yoonis ku baaqayaan in la hirgalyo dhismaha Dekedda Maydh
10. Beelah Habar yoonis waxay dawladda iyo Beelaha kaleba au soo jeedinayaan in la iska kaashado hirgelinta iyo dhismaha kaabayaasha Dhaqaalaha sida Wadooyinka iskuxidha gobolada iyo Degmooyinka Somaliland min Ceerigaabo ilaa Hargeysa
11. Beelaha Habar yoonis waxay yeelanayaan guddi Horumarineed oo lagu doortay Shirweynaha Beelaha Habar yoonis ee Daallo, magaceedana la yidhaahdo Tallo iyo Tawfiiq, taasoo hogaamin doonta iskuna dubaridi doonta Istaraatajiyadda fog iyo ta dhawbaee danaha Beelaha Habar yoonis
12. Beelaha Habar yoonis waxay raadsanayaan xuquuqda kaga maqan Xukuumadda jirta iyagoo u maraya sifo sharci ah iyo wadahadal toosan
13. Beelaha Habar yoonis waxay Dawladda iyo dhamaan Beelaha kale ugu baaqaysaa in Gurmad Deg Deg ah loo fidyo Gobolada Awdal, Salal iyo qaybo ka mid ah Gobolka Saaxil ee ay Abaaraha aadka u baahsani ka jiraan.
