Hargaysa( Geeska )- Wasiirka wasaarada qorshaynta Qaranka Dr.Sacad Cali Shire , ayaa kulan albaabadu u xidhan yihiin la yeeshay guddida arrimaha dibeda iyo iskaashiga caalamiga ah ee Golaha Guurtida.
Kulankan oo ka dhacay xarunta golaha guurtida ayuu wasiirku warbaxin kaga siiyay guddida arrimaha dibeda iyo iskaashiga caalamiga ee Golaha Guurtida shaqada wasaarada qorshaynta iyo qorshayaasha ku soo kordhay wasaaradaas.
Guddoomiyaha guddida arrimaha dibeda iyo iskaashiga caalamiga ee Golaha Guurtida Sahal Iidle Dirir,ayaa warbaahinta u sheegay markii kulanku dhamaaday in ay wasiirka ka wareysteen siyaasada xukuumada ee horumarinta,iyada oo warbixin dhamaystiran dhawaan loo gudbin doono Golaha “ Waxa uu wasiirku na siiyay warbixin aad iyo aad u dheer oo qiimo badan oo taabanaysa ama koobsanaysa Somaliland oo dhan , anaguna waxa aanu nahay guddida Golaha uga wakiilka ah , markaa warbixintaa wasiirka anana waxa aanu u gudbin doonaa Golaha” ayuu yidhi xildhibaan Sahal Iidle.
Wasiirka qorshaynta qaranka Dr.Sacad Cali Shire oo isaguna dhankiisa hadal kooban kulankaas kadib warbaahinta siiyay ayaa yidhi “Waxaan guddida siiyey warbixin kooban oo laba geesood ah, taas oo ay qaybta hore ahayd warbixin ku sabsan wasaaradda qaab dhismeedkeeda hawlaheeda iyo horumarkii aanu samaynay labadii sano ee u dambeeyey, waxaanay qaybta kale ahayd guud ahaan xaalada ka taagan wadanka, dhibaatooyinka ina hor taagan iyo waxyaabaha aynu u baahanahay in aynu iska kaashano ama wax uga qaban lahayd, guddiduna su’aalo way iga waydiisay arrimahaas ku saabsan, talooyina way ka soo jeediyeen, waanu tix galin doonaa talooyinkaas”
