Hargeysa (Geeska) – Xukuumadda Somaliland, ayaa ka hadashay War ka soo baxay Ciidammada Puntland, kaasi oo sheegayey inay Axaddii qabteen Sanaaduuq ay ku jireen kaadhadhka Cod-bixinta doorashadu.

Wasiirka Wasaaradda Arrimaha gudaha Somaliland Maxamed Kaahin Axmed oo Shalay ka hadlayey Hargeysa, ayaa sheegay in aanay jirin Kaadhadh Cod-bixineed oo Maamulka Puntland ka qabtay Somaliland, Dadka warkaa sheegaynay ay ahaayeen dad doonayey inay carqalad abuuraan.

Wasiirka oo arrimahaa ka hadlayaana wuxuu yidhi “Innagu waxaynu ku mashquulsan nahay Nabadgalyada, Maamulka Soomaaliyana wuxuu ku mashquulsan yahay Nabadgalyo-darro.”

Wasiir Kaahin waxa kale oo uu sheegay “Wax Alaale iyo wax ka jiraa ma jiraan (in Puntland qabatay Kaadhadhka cod-bixinta doorashada JSL), waa kuwii ka hadlay Maamulka Somaliland ee Gobolka Sanaag, nimankaasina waxay ahaayeen Niman Carqalad abuuraya, markaa halkaa wax dhibaato ahi kama jiraan..” ayuu yidhi.

Maamulka Puntland, ayaa isku daya inay carqaladeeyaan doorasho kasta oo ka dhacda Somaliland.

Geeska.net/Hargeisa Office