Hargeysa (Geeska )- Beesha Bariga Hargeysa ayaa shirjaraa’id oo ay ku qabteen magaalada Hargeysa ku sheegay in ay cid kasta oo Somaliland u dhalatay xaq u leedahay iska soo sharaxidda deegaanka caasimadda Hargeysa .
Waxay kale oo ay beeshu shirkan jaraa’id ku sheegeen in ay aad uga soo horjeedaan hadal dhawaan ka soo yeedhay qaar ka tirsan Salaadiin iyo odayaal ka tirsan beelaha deegaanka Hargeysa ku waas oo sheegay in Hargeysa ay beelo koobani uun iska soo sharaxi karaan.
Af-hayeen Salaadiinta Somaliland Suldaan Yuusuf Muxumed Xiiray oo ka warbixiyey ujeedada warbaahinta ula hadlayaan waxa uu yidhi “ Maanta waxaanu halkan ka sheegaynaa in aanay Hargeysi cid gaara caasimad u ahayn ee lawada daganyahay ,habaryoonis meelkasta oo ay dagantahay waxa deegaan u ah Hargeysa,” Suldaanku waxa uu si adag u sheegay in dhamaan dadka reer Somaliland ay iska soo sharaxi karaan caasimadooda oo aan cidna laga xigin.
Guddoomiyaha Beesha Habaryoonis Cabdilaahi Jaamac oo isna ka hadalay shirkan jaraa’id ayaa sheegay in xaddaynta arimaha doorashooyinku ay xaq u leeyihiin guddida doorashooyinka qaranku waxaanu yidhi “ ma jirto cid gaara oo xaq u leh in ay u tagaan Komishanka doorashooyinka yidhaahdaana ciddaas baa ka qaybagalasya doorashada golaha deegaanka Hargeysa taasina ka ma qaybgalayso.”
Suldaan Cabdiraxmaan Aw-good oo ka mid ahaa madax-dhaqameed shirkan jaraa’id ka hadashay ayaa sheegay in Hargeysa ay caasimad u tahay dhammaan dadka ku nool Somaliland waxaanu yidhi “ Hargeysa waxay caasimad u tahay dhammaan umadda reer Somaliland, Hargeysana waxaa iska soo sharaxi kara qofwal oo reer Somaliland ah waxaana jira caalamka dad Somaliland u dhashay oo haddana ku jira golayaasha caalamka sida Sweden.”
Waxa kale oo ka mid ahaa dadkii halkaas ka hadlay Caaqil Maxamuud Kirix waxaana hadalkiisa ka mid ahaa “ dadku waa dad wada dhashay cida cid farta ku fiiqad ee tidhaahda aniga hasha nala maalimaayo isna cid la maali maayo , waa in laga noqdaa go’aankkii ay dhawaan ay salaadiintu ku tidhi Hargaysa ayaan laga soo sharaxin beelo kooban mooyaane”.
Shirkan oo sida ay beeshu sheegay u jeedadiisu ahayd in la soo jeediyo in ay cidkasta oo Somaliland u dhalatay ay iska soo sharaxi karto deegaanka Hargeysa, kuna cambaareeyeen shir ay dhawaan Hargeysa ku qabteen Salaadiin ka soo jeeda Deegaanka Hargeysa oo sheegay in beelo koobani xaq u leeyihiin iska soo sharaxida golaha deegaanka Hargeysa, wax a kale oo ka mid ahaa dadkii ka hadalay oday Cabdi Xariir Cali, Xildhibaan Siciid Af –qalooc oo sheegay in aad uga soo horjeedaan in cid koobani iska soo sharaxdo Deegaanka Hargeysa.
