Maraykanka Oo Booqday Markab Dagaal Oo Uu Shiinuhu Leeyahay

Published on Apr 08 2014 // Warar

Wasiirka Difaaca ee Mareykanka, Chuck Hagel, ayaa tegey dekedda Qingdao ee dalka Shiinaha si uu u booqdo markabka keliya ee diyaaradaha xambaara ee Shiinuhu leeyahay, taas oo muujineysa kobaca milatariga Shiinaha.

Sarkaal ka tirsan dowladda Mareykanka ayaa sheegay in Hagel uu dalbadey inuu booqdo markabkaasi oo magaciisa la yiraahdo Liaoning, waxaana taasi ay ku soo beegmeysaa maalin kadib markii uu ugu baaqey Shiinaha inuu si mas’uuliyad ku dheehan tahay u isticmaalo quwaddiisa dhanka xiriirka gobolka iyo murannada dhuleed intaba.

Hagel waxa uu hadalkan ka jeediyey magaalada Tokyo maalintii Axadda, halkaas oo uu ka sheegay in xukuumadda Washington ay qorsheyneyso inay laba markab dagaal oo dheeri ah oo kuwa difaaca gantaallaha  u direyso Japan marka la gaaro sannadka 2017-ka si looga hortago khatarta ka imaneysa falalka Waqooyiga Kuuriya.

Xoghayaha Difaaca ee Mareykanka ayaa booqashada uu ku joogo Shiinaha waxay qaadan doontaa saddex maalmood, waxayna qeyb ka tahay booqasho toban maalmood uu ku marayo gobolka Asia-Pacific , si uu ugu xaqiijiyo dalalka ay isku bahda yihiin in Mareykanku uu ka go’an yahay dhaqangelinta heshiisyada difaaca ee uu kula jiro, kuna aaddan gobolka.

 

Leave a comment

Subscribe to our RSS Feed! Follow us on Facebook! Follow us on Twitter! Visit our LinkedIn Profile!