Kulan aan rasmi ahayn, qodob lagaga doodiyo, nuxur laga hadlaa jirin, cid markhaati noqotiyo, joogin looga qaateen, kuway xafiiltamaan iyo Xirsi Cali lug ku lahayn, nin kitaabka laabtiyo, imaam Samaale ka ahayn, salaadiinta barigiyo, beeshayadu ka tahay beri, warbaahinta gudihiyo, lagu darin saxafiyiin, ayaanu musharrax Muuse, ku wadaagnay magaalada. Waxan ka codsaday inuu iga caawiyo su´aalo badan oo uu jawaabohooda isagu xeel dheere u yahay.
Waxan weydiimihii ku bilaabay su´aalo kaftan iyo haasaawe ah, si aan madasha uga dhigo mid jawigeedu fur-furan yahay. Jawaabo lagu qanco oo dhiirranaan iyo kalsooni badani ka muuqato ayuu iigu jawaabay. Wax yar kadib markii kulankayagii dhammaaday ayaa waxan dib u eegay su´aalihii iyo jawaabihii, waxana ii soo baxay arrin aad u yaab badan. Akhrinta su´aalaha iyo jawaabaha oo aan markii hore sadarka ugu sarreeya ka bilaabay, ayaan markii dambe kasoo bilaabay sadarka ugu hooseeya qoraalka, anigoo kor u soo raacay. Arrintaasi waxay i siisay sawir iyo jawaabo ka duwan kuwii hore, kaasoo keenay dareen shaki badan abuuray.
Muuse. Goobtii bar kulankiyo, masraxii waynu joognaa
Weydiin. Muusow dhiskoogiyo, dhaantada ma tumataa ?
Muuse. Markaan soo dhex joogsado, qosolbay la daataan
Weydiin. Meel madaxi joogtiyo, ma shirteen Amiirrada ?
Muuse. Abidkaa qof yara dagan, boogtiisa lama duro
Weydiin. Muusow Magool iyo, ma qaadaa Maxamed Mooge ?
Muuse. Wax ku qaadan maysaan, wacdaraha aduunkee, weydiiya culimada
Weydiin. Muusow digtoornimo, ma dablaa ka door roon ?
Muuse. Qorshahaan diyaarshiyo, dantaydaa ku xidhan taas
Weydiin. Burcoo kala fogaataa, malaha adiga kuu roon ?
Muuse. May, midhkaa ka hadalkiisiyo, tuhunkaaba qalad ah
Weydiin. Xilku waa mid culuse, amaanada ma sidi kari ?
Muuse. Haa, illaa yom qiyaamaha anigaa dusha ku sidan
Weydiin. Qaraxyadii shaanidu, ma shirqoolladii Muusaa ?
Muuse. Khibrad aad u weyn iyo, aqoonteeda maba lihi
Weydiin. Deelleydii suuqa, maxaad kaga jawaabtay ?
Muuse. Anigoo wax dili kara, duco qaadan maayo
Weydiin. Dirirtii sokeeyaha, ma gabaybaad ka tirisay ?
Muuse. Walow aan idhaa qari, wejigay ku qoran tahay
Weydiin. Afka maxaad u taagtaa, ma xadaarad baan jirin ?
Muuse. Alle iima dhalin taa, anna kuma ducaysan
Weydiin. Daacadnimo la sheegiyo, dad la dhaqan ma leedahay ?
Muuse. Ma muran baa ka jira kaas, waa marag ma doone
Weydiin. Muusow Subeer Awal, doorkan yaa u sharraxan ?
Muuse. Hadaan daffiraad jirin, anigaa ku keli ah
Weydiin. Muusow saldanadii, yaa sumeeyey oo diley ?
Muuse. Goblan talo aduuneey, qadar Alle kasoo qaad
Weydiin. Aduun waayihiisiyo, siduu xaalku yahay maanta ?
Muuse. Waa nin iyo waagii, halkay tabari gaadhsiisay
Weydiin. Muusow Maxamed Biixi, ma dublamaasi weyn baa ?
Muuse. Inta aniga ii daran, cirku miyuu ku soo dumo
Weydiin. Muusow dadkeenii, abaar miyaa ku degem tidhi ?
Muuse. Allaa deeqda bixiyee, sadaqada u soo gura
Weydiin. Muusow Jamaal yare, ma jeebkaa ku caasiyey ?
Muuse. Rabbi janno ha geeyee, Faysalbaa boqnaha jaray
Weydiin. Aqoon yahanadii UFFO, xasuus maxaad ka haysaa ?
Muuse. Waagii kacdoonkiyo, taariikh mudan kasoo qaad
Weydiin. Bal sideetamaadkii wax yar iiga taabo ?
Muuse. Aduunyada nin noolow, maxaa aragti kuu laaban
Weydiin. Is bahaysigii qaxay, yaa goolalka u qalay ?
Muuse. Halkuu Xirsi raaciyo, Wadanibay ka heesaan
Weydiin. Muusow Kulmiye bari, yaa dhexdiina soo galay ?
Muuse. Ammaaneey waxba ha tarin, abaaloow adna lagu waa
Weydiin. Muusow sheekh Samaale, ma jannaa il laga tusay ?
Muuse. Jinkii Cali Guray galay iyo, kii Subeeriyaa maray
Weydiin. Ganacsadaha aw Siciid, ma siyaasi culusbaa ?
Muuse. Allahayow nin ii diran, duco maxaan ka daba diray .
Si aad u hesho jawaabo ku cajab geliya oo ka duwan kuwii hore, akhriska ka bilow jawaabta u hooseysa, adigoo kor u sii raacaya illaa aad ka gaadho halkii weydiimuhu kasoo bilaabmeen.
Abdirahman Hassan Yey
Daruuraha1@hotmail.com
Finland
