Hargeysa(Geeska)-Xisbiga KULMIYE ayaa beeniyay in loolan ku saabsan guddoomiyenimada xisbigaasi ay ka dhex socoto xisbiga iyo xukuumadda.
Guddoomiye-xigeenka labaad ee xisbiga KULMIYE Md. Axmed Cabdi-dheere oo shalay shirjaraa’id qabtay, ayaa wuxuu ka jawaabay warar ay warbaahintu baahisay oo sheegaya in wasiirka madaxtooyada Somaliland Maxamuud Xaashi Cabdi uu noqonayo guddoomiyaha xisbiga KULMIYE. “Waxaan halkan ka cadaynayaa loolan xisbiga KULMIYE dhexdiisa ka jira oo ay wasiiro ku tartamayaan inaanu jirin, xisbigu shirarkiisii wuu soo dhammaystay, guddoomiyaha xisbiga waxa ah Muuse Biixi, Maxamed Kaahina waa guddoomiye-xigeenka.” ayuu yidhi, waxaanu intaas raaciyay in wada shaqayn wanaagsani ka dhaxayso xisbiga KULMIYE iyo wasiirka madaxtooyada Maxamuud Xaashi Cabdi.
Warar maalmihii u dambeeyay soo baxayay ayaa sheegaya in guddoomiyaha xisbiga KULMIYE si hoose loogu magacaabi doono Maxamuud Xaashi Cabdi, wasiirka madaxtooyada, ka dib markii uu xisbiga Waddani dhawaan guddoomiyaha ku meelgaadhka ah ee xisbigaas u magacaabay xildhibaan Cabdiqaadir Jirde.
