Murankii ka dhashay mowqifka dowladda Somaliyaay ka qaadatay khilaafka dowladaha khaliijka iyo kan ay ka qaateen dowlad goboleedyada Soomaaliya ayaa cirka isku sii shareeraya, markastana waxaa kasoo kordhaya wax cusub oo arrimaha sii murginaya.
Markii hore arrinta waxa ay ku ekeyd kala aragti duwanaan oo kaliya, balse hadda waxa ay u egtahay in uu u talaabay khilaaf rasmi ah oo ragaadinaya laamaha dowladeed ee Soomaaliya oo markii hore ku jiray xaalad dib usoo kabasho.
Inkasta oo laga yaabo in markii horeba xidhiidhka dowladda dhexe iyo maamul goboleedyada qaar uu ahaa mid ul booc ah ku kutubayay, haddana murankan ka dhashay arrimaha khaliijka ayaa u muuqda in uu wax wayn u dhimayo rajo kasta oo laga qabay in xaaladda soo hagaagto.
Maamul goboleedka Galmudug ayaa noqday midka saamaynta ugu xun uu murankan ku yeeshay kadib markii madaxdii sarsare ee maamulkaasi ay ku kala qaybsameen moowqifka khaliijka.
Madaxweynaha maamulkaas Axmed Ducaale Gelle, Xaaf, ayaa taageeray go’aanka xulufadaha Sucuudiga, halka madaxweyne ku xigeenka Maxamed Xaashi Cabdi “Carabeey” iyo goddoomiyaha baarlamaanka Cali Gacal Casir ay taageereen go’aanka dawladdaFarmaajo iyaga oo cuskaday qodobka 54-aad ee dowladda dhexe siinaya awoodda ay go’aan uga gaadhi lahayd siyaasadda arrimaha dibadda.
Hase yeeshee waxa ay xaaladda cirka isku sii shareertay kadib markii madaxweyne Axmed Ducaale Geelle Xaaf uu sheegay in dowladda Muqdisho ay diyaaradii uu la socday “ku xayirtay magaalada Hargaysa”.
Maamulka Puntland ayaa isna qoraal uu soo saaray wuxuu taageero ugu muujiyay dawladaha Imaaraadka Carabta iyo Sucuudiga, sidoo kale maamulka Koonfur Galbeed ayaa isna taageeray dawladaha Imaaraadka Carabta iyo Sucuudiga, waana mawqif ka duwan mawqifka uu qaatay Mr. Farmaajo.
Madaxweynaha maamul goboleedka Jubbaland Axmed Maxamed Islaam oo ka hadlay magaalada Kismaayo ayaa nasiib darro ku tilmaamay isqabqabsiga dalka ka jira.
Waxa uu ku baaqay in uu Kismaayo ku fidinayo gogol la’isugu keenayo madaxda dowladda dhexe iyo maamul goboleedyada si loo turxaan bixiyo madmadoowga soo baxay.
Madaxweyne Axmed Madoobe wuxuu ka mid yahay labada hogaamiye ee aan ka hadlin moowqifkooda ku aadan khilaafka Khaliijka iyo go’aanka dhowladda dhexe.
Baarlamaanka Muqdisho ayaa iyaguna geestooda ku hanjabay inay u yeedhayaan safiirka Imaaraadka u fadhiya Muqdisho, waxaanay sheegeen inay mooshin ka keenayaan dawladda UAE.
Geesta kale Maxamed Cabdillaahi Farmaajo ayaa shalay socdaal ku tagay dalka Sucuudiga, socdaalka oo aan xog badan laga hayn ayaan la ogayn inuu wax ka bedeli doono mawqifkii Farmaajo ee khilaafka khaliijka oo hadda u muuqda inuu dawladiisa gilgilay.
