Hargeysa(Geeska)-Ergayga Midowga Yurub ee gobalka Geeska Afrika Mr. Alex Rondos, ayaa ka hadlay Somaliland iyo sida ay ugu guulaysan karto halgankeeda.
Danjire Alex oo toddobaadkan hadal ka jeediyay xarunta Wilson Center ee dalka Maraykanka, ayaa waxa su’aal ku saabsan Somaliland weydiiyay wakiilka Somaliland u fadhiya dalka Maraykanka danjire Bashiir Good, waxaanu ergayga Midowga Yurub oo ka jawaabaya su’aasha wakiilka Somaliland uu yidhi “Somaliland waxaay joogtaa taariikh ahaan meel xiiso badan. Tani waa gobol dhif ka ah Afrika oo soo maray awood isku bedel sharci ah. Adiga oo Somalilad metelaa na waxaad dabcan jeclaan lahayd in mar saddexad ay saasi dhacdo. Xaqiiqdu hadda waxay tahay, anigu ma gelayo in la ictiraafo iyo in kale, taasi waxaay u taal deriskiina, dadkiina, Somaliya lafteeda, Midawga Afrika iyo kuwa kale, balse waxa aan shaki ku jirin in mudo dheer oo ay Somaliland awood u yeelato inay sii muujiso inay ilaalinayso xasiloonida, way caawinaysaa hadii Somaliland ay muujiso inay awood u leedahay inay samayso is bedel siyaasadeed oo nabad ah oo lo marayo geedi socod doorasho, waxaana fiican inay sidaas ku adkaysato sababta oo ah waxa muuqata inay hada yara bariiqatay halkaasi.”
Ergayga oo hadalkiisa sii wataa wuxuu yidhi “Waxa ila tahay waqtiga ayaa kala cadayn doona waxan sheegayo, waxaan se soo jeedinayaa waxaay tahay in Somalilanders ku, iyada oo aan waxba loo dhimayn hiigisigiina, waa inaad si taxadar ah ula socotaan waxa ka dhacaya gobolka oo dhan. Ma ka jiraa gobolka qaab balaadhan oo Somaliland ku raadin karto hiigsigeeda si aan koobnayn oo gaar ahayn balse buuxinaysa sida guud ee gobolku u dhisan yahay, sababta oo ah waa halkaas meesha xaqiiq ahaan mustaqbalku ku jiro, maaha oo keliya Somaliya, balse dhamaan deriska Somaliland oo dhan. Waxaynu u baahanahay inayu u fekerno si ka baxsan sida caadiga ah.”
