Ergayga Cusub Ee Qaramada Midoobay Iyo Milicsiga Aragtidiisa Somaliland Iyo Wada Hadalada Hargeysa & Muqdisho

0
311

Hargeysa(Geeska)-Xoghayaha guud ee Qaramada Midoobay ayaa khamiistii wuxuu ergaygiisa arrimaha Soomaalida u magacaabay danjire James Swan, oo ah diblomaasi Maraykan ah oo khabiir ah. James Swan ayaa sidoo kale wuxuu noqon doonaa madaxa xafiiska Qaramada Midoobay.

Haddaba, ergaygan oo Maraykanka hore ugu ahaa safiirkooda u qaabilsan Soomaalida, ayaa waxa ay dad badani isweydiinayaan aqoonta uu u leeyahay Somaliland iyo xogta uu ka hayo, maadaama oo ay Somaliland xudun u noqon doonto shaqada iyo xilka uu xoghayaha guud ee Qaramada Midoobay u soo magacaabay.

Wargeyska Geeska Afrika ayaa dib ugu noqday kaydka uu ka hayo ergayga cusub ee Maraykanka ah oo hore si waafi ah uga hadlay qaddiyadda Somaliland, wada hadalada Somaliland iyo Soomaaliya iyo amuuro kale oo gobalka ku saabsan.

September 2012

Bishii September ee sannadkii 2012, wuxuu danjire James Swan ka hadlay wada hadaladii Somaliland iyo Soomaaliya,

Danjire James Swan, oo markaas ahaa  safiirka dalka Maraykanka u qaabilsana Somaliland iyo Somaliya ayaa shirjaraa’id oo ku qabtay magaalada Nayrobi ee dalka Kenya, wuxuu ku sheegay in wejigii hore ee wada hadalka Somaliland iyo Soomaaliya lagu qorsheeyay sidii uu wada xaajood wax ku ool ahi u dhici lahaa mustaqbalka. Isagoo ka jawaabayay su’aal la weydiiyay oo la xidhiidhay hadal uu Madaxweynihii hore ee Soomaaliya Xasan Sheekh Maxamuud oo markaas la doortay uu ku balan qaaday inuu sii wadayo wada hadalada Somaliland iyo Soomaaliya, wuxuu yidhi safiirku “Wada hadaladii u dhexeeyey Somaliland iyo xukuumada Muqdisho ee Ingiriiska iyo Norway fududeeyeen, ayaa muhiimadii ugu horeysay ee wada hadaladaasi noqdeen kuwo lagu qorsheeyo sida mustaqbalka wada xaajood wax ku ool ahi u dhici lahaa. Sidoo kale, waxaan filaynaa in qorshahaasi sii socon doono, iyagoo ku dhisan sidii bilowgii ay ku heshiiyeen, kuna bilaabi doonaan inay qorshe dhigtaan, oo bilowga la cadeyn doono qodobada wada xaajoodka mustaqbalka lagu soo qaadan doono. Laakiin, taasi waxay u muuqataa mid ku soo kordhaysa hawlahii labada dhinac oo xilligan bilaabaya inay qeexaan shuruudaha wada xaajoodkaa.”

March 2013

Bishii March ee sannadkii 2013, wuxuu danjire James Swan, waraysi uu siiyay koox lagu magacaabi jiray USDOTSomali, oo ka tirsanayd wasaaradda arrimaha dibadda ee Maraykanka, waxaanu waraysigaas  ku sheegay in Maraykanku la dhacsanyahay horumarka ay Somaliland ka samaysay dhinacyada ammaanka, kobaca dhaqaalaha iyo dimuqraadiydada,  “Dawlada Maraykanka iyo saaxiibadeeda caalamkuba waxay qadarin iyo ixtiraam weyn u hayaan dedaalka ay sameeyeen dadka reer Somaliland sanadihii la soo dhaafay iyaga oo si heersare ah u  ilaaliyay nabadgalyada iyo xasiloonida dhulka Somaliland, iyo dhinaca dawlada oo qabatay dhawr doorashooyin oo aad u heer sareeyay, waxa kale oo bogaadin iska leh shacabka dedaalkooda ay ku doonayaan inay ku hagaajiyaan dhaqaalaha iyo arimaha nolasha.”

Wuxuu diblomaasigan Maraykanka ahi intaas raaciyay “ Sidaas daraadeed dawlada Maraykanku waxay rabtaa inay sii wado inay kala shaqayso dadka Somaliland iyo maamulka dhinacyada gargaarka bini’aadanimo, dib u dhiska iyo horumarinta iyo dhinacyada xidhiidhka dawladnimo ee aanu wadaagno,  isla markaasna mawqifka dawlada Maraykanku waa mid barbar socda la’na mawqif ah qaramada midoobay, midawga Afrika iyo dawladaha la jaarka ah Somaliya.”

Gunaanad

Waxa muuqata in ergaygan cusub, inkastoo laga yaabo inuu wato siyaasadda dawladda Maraykanka oo wakhtigan ah mid kool-koolisa dawladda Soomaaliya, haddana uu uga duwanaan doono Somaliland  wakiiladii hore ee Qaramada Midoobay oo badankooda xilkan loo soo magacaabay iyagoon fahan badan ka haysan kala duwanaanshaha Somaliland iyo Soomaaliya.

Ergaygan ayaa wuxuu 24 January 2012 madaxtooyada Somaliland kula kulmay Madaxweyne Axmed-siilaanyo oo ay ka wada hadleen qodobo ay ka mid ahaayeen nabadgelyada guud ee Geeska Afrika iyo saamaynta ay ku leeyihiin argagixisada iyo budhcad badeedii wakhtigaas jirtay.

 

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.