Hargeysa(Geeska)-Akhristayaal, waxaanu halkan idiinku soo gudbinaynaa qaybta labaad ee maansadii uu Abwaan Axmed Aw Geedi habeen hore soo bandhigay,taas oo uu si kulul ugu dhaliilay xukuumadda Somaliland. Maansadaas oo ah mid miisaan suugaaneed leh ayaa soo jiidatay dareenka shacabka. Wuxuu Abwaanku yidhi
Ha dan seegin bay tidhi
Adiguna ma duuloow
Calaf dug ma yeeshee
Dabaweyn haddaan cunay
Daayin baa I siiyee
Ha dagaalin oorida
Dalaaqdana ha maqashiin
Darantiyo waraabkiyo
Deegaan u raridiyo
Daaq geynta xoolaha
Adba uma dadaashide
Ha deg dhebin qofkay tidhi
Lama dilo haweenkee
Waxaan uga danleeyahay
Raga meesi loo diray
Daayacay waxoodii
Ka durduurshay bahalaha
Maxay dooda beenta ah
Muran iyo is diidsiin
Hadalka ugu darayaan
Afartaadar maw xidhay
Ma durduushey sida geel
Hormo kalana soo daa
Wuxuu doonayaa gocor
Inuu digo qabowdiyo
Dab bakhtiyey afuufaa
Dakanooyin dhidhiyaa
Dawan cudur istaadhaa
Duufaano kiciyaa
Degelkeena biiyaa
Wuxuu doonayaa gocor
Iney habar dadqalatii
Ubadkeena dubataa
Isaguna la dooxdaa
Dhaylada la diirtaa
La duxsado shariiryaha
Wuxuu doonayaa gocor
Inuu doob tacliin lihi
Damac iyo hanbeelaa
Darbi jiif ahaadaa
Midna baawer derejiyo
Xil digreeto ku ansaxay
Hadba xaajo dalabliyo
Hab delegen ku qaataa
Wuxuu doonayaa gocor
Qubanahan dayacanta ah
Maatidan darleefka ah
Deyro dhaafka jiilaal
Iney diilaliyo dhaxan
Dibadaha u hoydaan
Isna aqalo daahweyn
Ku dekeeyo keligii
Wuxuu doonayaa gocor
Sidaan daacada u ahay
Halgankaan dirida adag
Kaga dhigey ris iyo doox
Dibin daabyadaan maray
Inaan hogor dugsooniyo
Daal tirasho waayaa
Isna daansha dhaanshaha
Dawlahada kan tarandacay
Dhulka midabka dooga leh
Daymada cagaarka ah
Quruxdana la daawado
Inuu soo dalxiisaa
Wejigiisa dahabka ah
Boodhkii ku duulana
Diib lagaga dhaashaa
Nafta dawshad iyo buuq
Laga soo dabiibaa
Wuxuu doonayaa gocor
Inuu god iyo bohol dedan
Hir sakaaro lagu dago
Igu sii duduucaa
Lafahayga duugaa
Hadhowtana diyo la’aan
Dafiraad walle u badan
Raacdada ku didiyaa
Dacwadeyda qariyaa
Wuxuu doonayaa gocor
Inuu dahab ka dhigo maar
Maartana ka dhigo dahab
Xumo samo ku doorshaa
Wuxuu doonayaa gocor
Iney kala dab raacdaa
Dangalooyin noqotaa
Iyo jeesas kala dida
Qaranbaa I deeqee
Anna diiday reer reer
Ma hungowdo daacadi
Haba loo daraadee
Dawo male shir beeleed
Iyo ruux duraansaday
Dawo male shir beeleed
Iyo dawdar ka af laxay
Dar allee shan midabloow
Ninka duubka kaa lulay
Derejooyin kugu taxay
Kaa dhigay rag doorkii
Dabin looma qoolee
Ha degdegine caga dhigo
Nabsi haw fariin diran
Ha u yeedhan daa’iro
Dibna haysu qolof ridin
Dar alle shan midabloow
Dulmi haw qareen noqon
Xaqna haw dardaar werin
Ha galaafan ducafada
Ha ku digan agoomaha
Ha durqumin masaakiin
Ka dibireyna booliga
Deeq hawgu sii ladhin
Dar allee shan midabloow
Dadka garangarta u yaal
Waa duul isma hurto ah
Waa dir iyo daabaan
Waa ul iyo diirkeed
Carabka iyo laba daan
Isu soo du’ mooyee
Kala didini waw halis
Nin khiyaamay doorsoon
Ninka deyriyaa eed
Ninka dumiyey leeleel
Isku duubnidoodaad
Adiguba ku tahay damal
Iyo deyr wax caabiya
Dar allee shan midabloow
Hadba damaca laaciyo
Ha siyaadin dalan kaca
Doolaalo haw dhiman
Balan hore ha dacal marin
Ha dayacin xil weynbaa
Dumadaada saarane
Dar allee shanmidabloow
Nabadiyo degenidaa
Lagu kala danbeeyaad
Adiguba ku darartaye
Bal u fiirso dacalada
Docahaaga qaar eeg
Dugayeyda dhiilada
Sida loogu dabar go’ay
Deris aad ka baratide
Dar allee shan midabloow
Rag sidaada deli dhacay
Dibso laga ayn go’ay
Daruur mooday dhalanteed
Haabhaabtay dunidaba
Degta inay ku qaataan
Kibirkiyo durduradii
Muxuu dhaansha dhaanshuhu
Deyn iyo jar dheeriyo
Daadeys ka raariday
Dar alleeshan midabloow
Diintana ha caasiyin
Ha dafirin illaahbaa
Dul badin iyo naxariis
Galadiisa daadka ah
Kugu daajinaayee
Dhinacaaga dogobiyo
Dubayiyo ha badin naar
Dunqulaalna haw hurin
Nafta meel u daran iyo
Haw deyrin guri baas
Dar allee shan midabloow
Ninka dhagax dixeediyo
Dundumooyin la hadlaa
Dux ka gaadhi maayee
Salax erey ma diiqee
Doocaagu ba’anaa
Bal mar uun digiigixo
Halaguu duceeyee
Nin dardaarmay baa yidhi
Saddex dayro lama qoro
Dadna looma quudhsado
Dhaqashuu ka yahay deeq
Korid buu ka yahay ducuf
Iyo wuu dal dheeryahay
Dana weli umaad mudan
Dabuub weeye dhaxal gala
Waxa loogu digayaa
Ninka kibir la diidee
Dala’saday asaagii
Afartaasi waa duud
Dayib weeye qun baxay
Waa degel san iyo hawd
Qormo kale u soo deyr
Beeshoo danood iyo
Deyr iyo afmeer taal
Oo dirirka cawleed
Maansheeyey dunidii
Waraabaa dagaagoo
Reer buu u dalaq yidhi
Wan weyn buu ilkaha daray
Dudadaana kala dhacay
Habeen kalana soo dool
Deyluu ka buuxsaday
Oo aan dib loo arag
Habeen kale dugaagii
Ri irmaan ku durufaaq
Habeen kalena daahoosh
Muskuu soo derderay oo
Daabaxuu mid qaatoo
Duleedada kusoo cunay
Duf ku baxe habeen kale
Sabeen duudka kala jebi
Sarar iyo leg dagan buu
Ka dibiray dhurwaagii
Laqanyuu dardhanayaa
Caawana mid darayuu
Ku darsaday kuwii hore
Habeen qudha ma daahee
Sidii duunyo uu dhaqay
Ama deyn ku leeyahay
Aaskuba hadduu dumo
Reerki wuu duljoogaa
Odaygii ducaalee
Danbaabaayey xoolaha
Lexojeclo damqaysiyo
Ciilbaa dishoodoo
Duqu shaamareeryoo
Ahminkiisa dabar go’ay
Iyo dumar canaantii
Cadhadii is dabi gaadh
Qayladii daluuntoo
Deris iyo xigaal iyo
Warac baa la doonoo
Rag uu madaxu diirmiyo
Qaafo doora baa timi
Dooyeyste geedkii
Tashigiina lagu daal
In la qodo daluun dheer
Oo caws dameeriyo
Duur lagu areerimo
Ayey talo ku daayeen
Waraabii degdegi jiray
Xeradii daf soo yidhi
Sumal badhi la daaluu
Mus danbeedka kala baxay
Digdigta iyo fadalkii
Hadba baala deymaha
Isagoo dakano qaba
Shaxdii loo daleeyiyo
Godkii buu ku dubuq yidhi
Qosol wuu danbeeye
Odaygii ducaaloo
Qardada iyo daalkii
La gataati duuloo
Sardho dheer duraantaa
Didmadii baraarkiyo
Deydey kutoosoo
Doodiyey itaalkii
Digif difigta raacdada
Deyrwaa xambaaroo
Wuxuu dulun dulceeyaba
Xabaashii ma dalaq yidhi
Dan baa tidhiye xaajiga
Dhidarkii is daawade
Hadba labadan dawsare
Didmadiyo cabsida qaba
Booraanta deyn ka ah
Midba dhinac u duulaan
Waana lays duljoogaa
Ku deyow waaraabii
Godka daakhilkiisii
Harareemay debedii
Wuxuu yidhi ma duushaa
Kolba duudka koruqaad
Waa diriye qararkii
Jeenyaha la doondoon
Odaygii ma daahine
Dalacaada badhi taar
Cadawguu alle u dabay
Muu diline kaalmee
Dir waraabe taageer
Sida loogu daranyahay
Ama loo daleensaday
Dareen uma lahaadaan
Xansaskooda dayrka ah
Halka dagan ma eegaan
Ma dalaalimeeyaan
Dir waraabe taageer
Damaciyo durwaagii
Dulaanka ugu yimi
Xeradooda duunyada
Bahalkii dareersaday
Daldashayeen wax kaga tegin
In la dilo ha joogtee
Waabay sii daliciyeen
Dir waraabe taageer
Hadtidooda daranyiyo
Darxuma iyo habaqliyo
Daayaca allaa baday
Dir waraabe taageer
Dunjigoodu waa gobe
Waxa keenay dubu dhaca
Dhaqankooda dawdilan
Waxaan uga danleeyahay
Weligood dad liitey
Dawlad xumi ka dhalataa
Waa dabeecad soo tiil
Dawladnimadu waa geed
Wa damalka la hadhsado
Marna waa daleel iyo
Bactaleesha dabeda ah
Waa laba deryaaliyo
Dugsi celiya gawraha
Marna waa dediyo dhaxan
Lagu diirsan waayaa
Derbi weeye culus iyo
Dube cadawga lala dhaco
Marna waa hub dananoo
Lagu dilo sokeeyaha
Iyadaa dadnimadiyo
Daaweysa gobanimo
Marna way la dirirtaa
Iyadaa wax dumisoo
Duligay hor marisaa
Waa daabad ruuxii
Dahrigeeda fuulaa
Danyar ugu adeegaa
Marna waa darmaantuu
Nacas derejo moodaa
Waxa dagan ku boobaa
Booliga ku daaqaa
Dabadeedna eedaa
Marna waa xaq daalacay
Waa duciyo reynreyn
Dulmi weeye lagu jabo
Marna waa xaq daalacay
Waa duciyo raynreyn
Marna waa abaar dama
Hadba waxay la dooctahay
La dareen wadaagtaa
Cida wadaha doonta ah
Ama darawalkeeda ah.
Shicib dawlad waayoow
Miyaan roob kastoo da’a?
Garbo-diiri weligeed
Nin daguugan waayeyn
Inaguna dabciga qaran
Ummadeenu dul ahaan
Meeshiyo dab-tuurkii
Hadba mid u daraadoo
Dabra saw ma waayaan
Shicib dawlad waayoow
Xaajada markaan deyey
Dusdus iyo khiyaamiyo
Ildamuuqsi baa jira
Shicib dawlad waayoow
Dibnaa kuu halaan hali
Uurna waa la dabayaa
Shicib dawlad waayoow
Doonidaan ku joognaa
Duufaan bay u halis tahay
Shicib dawlad waayoow
Daarta aad dhisaysaa
Duufaan bay u halis tahay
Shicib dawlad waayoow
Ruqahaad dar leeyahay
Dabaday hayaan qaar
Shicib dawlad waayoow
Derderaada faanka ah
Afka beenta dawdebey
Aragtida dir sooca ah
Himilada dayowga ah
Boholaha daluunta ah
Waa lagugu dagayaa
Dabin baa la dhigayaa
Lala gaadayaa deer
Geri baa la dilayaa
Dibi ba la qalayaa
Doqon baan ka kicin qiiq
Shicib dawlad waayoow
Isma qariso daacadi
Haday ri’I dub leedahay
Dabadey ku qarin leyd
Tiisaba daryeelaa
Adna kuugu dari kara
Shicib dawlad waayoow
Dilaal iyo malaal iyo
Diric naar afuufiyo
Nin danlaa ku kala gura
Shicib dawlad waayoow
Daad furay mahiigaan
Bari waqalka ka dayreed
Duufaanka weedhka leh
Waxaraha da’miliceen
Doogaasha ku afurin
Daratiyo jaglana galay
Duuflaha xayeeshka ah
Dardhashada qabowga ah
Qaadh looga dagagarin
Xageen waxaka daqaqama
Gabayooxa lama dega
Uga daad gureynaa?
Shicib dawlad waayoow
Rimeydii la daajee
Hadba rabadin doogliyo
Doh banaan la geeyuu
U sid tiriyey doob jirey
Markay fool la dihatee
U daruuray gaawaha
Gabno kuma daryeeshee
Mar haday hu deeliyo
Deeqi weydo maatida
Ama diido nirigtaba
Dib inuu u xaraashiyo
Inuu daabaxoow furan
Shicib dawlad waayoow
Gabadhii la doonee
Aqal laba deryaaliyo
Dadab lagu aroosee
Laga dhiibey duunyada
Mar haday danteediyo
Alab dumar lahaa iyo
Garan weydo dawgii
Oo daad usoo galo
Waa damal hadh waayee
Dawliil dheer nin kii qabey
Dalaaq iyo wallow furan
Duur xulkeedu wuxuu yahay
Ama uga dan leeyahay
Mar wakhtigu diraac yahay
Daan kulul abaareed
Loo raray degmada hawd
Dixo lagu habeen dhaxay
Hayinkii diboodee
Intuu gooyey dabarkii
Duburaha ka xulay hawd
Aar dile dib haw raran
Afartaa danguudiyo
Dacwad laga aloosiyo
Sooyaalka duugiyo
Runta oon laf diiriyo
Qalin iyo dawaadii
Bari way ka dayrsheen
Bogox doogii kama bixin
Guban waa dab iyo halas
Oogo roobkii kama di’in
Dubadoow hasheenii
Xagee loo dareersha
Daa’imaa la joogtee
Bal abwaanadii doon
Kolay daad madheedhiyo
Daan bari u foofshaan
Ama deexba geeyaan
Maroodiga duqoobaa
Duwi jiray beryii hore
Dhirtu laqanku daadshee
Dabcigaan aqooneyn
Dada uufaneyskiyo
Qalanjaa durdurisee
Arbayahow ku darayaa
Waad raxan wad daysaye
Orod wabiga dul u dhaaf
Doy iyo dhul dheer qabo
Duubkiyo xilkana siib.
Saddex lama dugaashado
Dulmi iyo gar eexaad
Guri dulinku muushyahay
Iyo talo digtaatoor
Ninka yidhi dar baan xidhay
Danyaraha ka dhaanshada
Dadna wuu u simanyahay
So’da ceelka loo degey.
La soco……….
Muxuu faan darooriyey
Diidiiyo hadalkiyo
Kibirkyo danaanigu
Doqon dheregtay wow caad
Taadaba u daayoo
Hadduu dararay dhiin waal
Aduunbaa durduurtaye.
La soco……….
Ma afurin dadweynii.
Siduu yidhi digtoorkii
Danbarkeedii maandheeq
Nimaan doonin baa dhamay
Shicibkii dagaalamay
Ayaa daadsan suuqyada
Daayeer qadhaab tegey
Dantiisuu ujarmaadee
Fulsho ruuxa daaqoow
Annigiyo dir raaraco
Daaweysan maynoo
Duuf kuma qadeeyee
Waxba yaan la ii dudin
Ku darsoo walaalow
Dad waxaan u necebahay
Ninka daacad gawracay
Iyo diradiraalaha
Dan wadaagta kala raray
`
Dermo wadari jiiftiyo
Aqalkii dugsoonaa
Iyo laba daryaalii
Qarankeena deeqee
Salka dhaban dulaamiyo
Daafigu gilgili jirin
Waxa ay ku doorsheen
Guri aan daroor iyo
Inna daadka celineyn
Oo dadabtii hoosiyo
Foodsaarkii diirteen
Oo udubkii daacoo
Durba soo qan doodsaday
Iyo buul duqeed raba
Inuu dumo ayaan dhow
Dubur laxo nin joogoow
Taladaada debecdiyo
Xilka kaa dalooshamay
Galdalooladaadii
Hurintii dadaashiyo
TV gu dediwaa
Belo laga ducaystiyo
Haaweey derderan iyo
Dooxatiyo wareentaba
Kolay tahay daraawiish
Wixii duul nasoo maray
Daayin hayna dhaafshee
Kuwanaa u diga kulul
Dulmigii karuuriyo
Hadduu doobi buuxsamo
Inuu daato waa faral
Shimbir duulay soo noqoy
Haba koro daruuraha
Dan baa hoos u soo celin
Dulmiyoow nasoo dhaaf
Dayaxaagi wuu dhacay
Diga rogo habaaroow
Dibna hawgu soo noqan
Illaa daayin abidkaa
Intu samuhu deeqiyo
Duugana anys ka leh
Allay lehe dadkaygoow
Darraad waad as qowdeen
Shalaytana dayowdeen
Maantana dar jiidheen
Waxaad daydayey saan
Aan kuu dardaarmee
Daliilkiyo qur’aankiyo
Daahyada furqaan iyo
Xaqu diinta weeyaan
Musxafkaa ha sii deyn
Hadduu gabaygu deris yahay
Ama loo kitaab dayo
Adigaa dabka u sida
Guuleed da’daadee
Maansadu dirweeyee
Degelkay ku dhalatoow
Daad soo jirfaday iyo
Duufaankii xiisiyo
Hoohiga darooriyo
Daruur curatay baad tee
Godkuu degey adoowgaa
Ku´aroori deeleey
Daaraanta faallee
Xaqa duub u soo xidho
Soo durug AF- gudhiyoow
Adna CAAMIR haw dagan
Dalmar iyo jiheeyiyo
Hadawamiyo MEECAAD
Hadareemo MOWLIID
Bedel daabad haw koro
Weedhsame ha daabaco
Cabdi gaydhna haw diro
Mursal haw dabaal dego
Budin yuu ka daahine
Dabaylaha u sii fara
Hadu beeyo xaalleef
Daadihi san-dheeroow
Dabka maxamed haw shido
Ilko jiir ha daaree
Dunqulaali Gurayoow
Daran doorri Wabaxoow
Damalkii af tahaniyo
Caatana ha diirsado
Ragii daalo jirey iyo
Mustafana ha daakiro
Darawali Badeedoow
Nuux Maxamed deeqsii
Doob hootada u dhiib
Haybana ha duurxulo
Dhuux digaale yuu hadhin
Hadaleeyo Ubaxlana
Geeraar nin daaqsaday
Xikmad baa ku duugane
Waa danab Cajaa’ibe
Yaanu milil dushii dhayin
Ina Baashe waa duqe’
Xiin finiin dirkiisii
Dummad gowska haw dhigo
Cali duulna maah maah
Haka baadho diiwaan
Caaro dhuub ma daahee
Heeshiguu dareersaday
Intuu maro dambeedada
Ha milaalo doobiga
Dibno hadal ka soo baxay
Deeqaaf ma waayee
Qoranaa hal-dooree
Deridiyo dhaliishiyo
Haka jiro dildaalyada
Inta ila dareeniyo
Dul ahaan gabyaagoow
Maxaa loo dangiigaa
Sow kan daad usoo galay
Dadyaw ma hurtadeenii
