Bidaarta Iyo Cirradu Haddii Ay Afartan Jirka Ka Soo Horreeyaan Caafimaad Darro Ayaa Ay Astaan U Noqon Karaan

Published on Dec 09 2017 // Googooska Geeska

Delhi (Geeska)- Cilmibaadhis ay dhowaan sameeyeen dhakhaatiir reer Yurub ah ayaa daahfurtay in ragga ay bidaarta iyo cirradu ku timaaddo 40 jirku ay u badan tahay in uu wadne xanuun mustaqbalka ku dhaco.

Kulan ay dhakhaatiirta caafimaadka wadnaha ee adduunku ku yeesheen magaalada Kalkata ee dalka Hindiya ayaa ay ka hadleen dhakhaatiirta cilmibaadhistan sameeyey, iyaga oo ugu horreyn sheegaya sababta ku kalliftay daraasadanna waxaa hadalladooda ka mid ahaa, “Intii aanu cilmibaadhisihii hore wadnay waxa aanu dareennay in uu jiro xidhiidh ka dhexeeya bidaarka, cirrada iyo wadne xanuunka, taas ayaana keentay in aanu dhowaan samaynay daraasad aanu arrintaas ku eegayno” Waxa ay intaas ku dareen in si ay u hubiyaan natiijo sax ahi inay u soo baxdo ay tijaabooyin kala duwan ku sameeyeen dad wadne xanuun leh iyo kuwo caafimaad qaba, iyaga oo samaynaya shaybaadho dhiig iyo hubinta xaaladdooda jidheed, natiijada u soo baxdayna waxa ay ku sheegeen sidan, “Tijaabadaas iyo shaybaadhisahaas kala duwan kadib waxaa dhakhaatiirta u soo baxday in qiyaas ah boqolkiiba 27 dadka wadne xanuunka lihi ay xanuunka ka hor intii aanay 40 jir gaadhin isku arkeen bidaarta, halka boqolkiiba 30 ka mid ah dadka wadne xanuunka qabaa ay cirro yaraan ku yeesheen”

Kamaal Shaarma oo ka mid ahaa dhakhaatiirta hormuudka ka ahayd daraasadda ayaa faahfaahiyey sida ay xidhiidh u yeelan karaan wadne xanuunka iyo bidaarta ama cirradu waxa aana hadalladiisa ka mid ahaa, “Waxa aanu aaminsannahay in marka horeba sababta keenaysa cirrada ama bidaarta yaraanta ku yimaaddaa ay tahay gabow waqtigiisii ka soo horreeyey oo jidhka qofka ku dhacaya, kaas oo marka hore keenaya cirro ama bidaar, marka uu sii socdana keenaya caafimaad darro dhinaca wadnaha ah”

Ugu dambayn waxa ay dhakhaatiirtu soo jeediyeen taladooda arrintan ku waajahan, waxa aana ka mid ahaa, “Qof kasta oo isku arka cirro ama in bidaari soo gelayso isaga oo aan gaadhin da’dii laga fialnayey, waxa aanu kula talinaynaa in uu si dhaqso ah ula xidhiidho dhakhaatar xaaladdiisa la socda, gaar ahaan dhakhaatiirta ku takhasusay wadne xanuunka”

 

Leave a comment

Subscribe to our RSS Feed! Follow us on Facebook! Follow us on Twitter! Visit our LinkedIn Profile!