Hargeysa, (Geeska)- Xukuumada Somaliland ayaa markii ugu horeysay shaaca ka qaaday in hogaamiyeyaasha Soomaaliya u cadeeyeen inay qiimayn doonaan dalabkooda bedelaada xubnahii muranka keenay, haddii natiijo ka soo bixi weydana uga raadin doonaa aqbalaad iyo taageero dhinacyo kale.
Wasiirka Arrimaha dibedda Dr. Maxamed Cabdillahi Cumar ayaa hoosta ka xariiqay inay Somaliland guul u tahay maadama ay miiska wada hadalka isku soo horfadhiisan doonaan Soomaaliya iyagoo laba qeybood oo siman ah.
Dr. Maxamed Cabdillahi Cumar oo wareysi gaar ah uu wargeyska Geeska Afrika wax kaga weydiiyey wada hadalka dhowaan ku dhexmari doona Soomaaliya ayaa mar labaad ku celiyey in ka qeybgalka Somaliland ku xidhan yahay fulinta shuruudahii ay hore ugu xidheen, su’aalahii la weydiiyey iyo jawaabahii uu ka bixiyeyna waxay u dhaceen sidan:
S: Dhowaan waxa loo ballansan yahay wada hadal dhexmara Somaliland iyo Soomaliya, maxaad nooga sheegi kartaa mowqifka Somaliland shirkaa la tegi doonto?
Waxaan dhowaan London kula yeelan doonaa wada hadalo siyaasadeed oo fool-ka-fool ah Soomaaliya markii koowaad 21-kii sannadood ee Somaliland jirtay. Fursad wanaagsan ayey noo tahay aan ugu soo bandhigno go’aankayaga iyo hiigsigayaga Soomaaliya annagoo miis wada fadhina, oo laba qeybood oo siman ah. Wada hadalkaa laftiisa ayaa guul u ah Somaliland. Waan sii wadi doonaa wada hadaladaa si aan ugu gaadhno hadafkayaga.
Hore, Somaliland waxay ku xidhay shuruud ka qeybgalka wada hadalada Soomaaliya bedelaada xubno u dhashay Somaliland oo Madaxweyne Shariif ku soo daray xubnahii uu magacaabay, welina ma hayno meel lagu bedelay xubnahaa, miyey isbedeshay shuruudii hore ee Somaliland? Hadiise mar kale la soo celiyo maxaa idiinka meel yaal?
Ka qeybgalka Somaliland ee wada hadalada London waxa shardi u ah shuruudaha aad sheegtay. Xukuumada ku-meel-gaadhka Soomaaliya waxay noo sheegeen inay qiimayn doonaan dalabkayaga bedelaada.
Wada-hadalada noocyadan oo kale hore dalal badan ayaa soo maray ugu danbeeyeen kala go’ii labada Sudan, waxaana jiray wadamo qeyb ka ahaa ama dhexdhexaadinayey, wada hadalada idiin qorshaysan ma jiraan wadamo qeyb ama markhaati ka noqonaya wada hadalkiina?
Xukuumada Somaliland waa u diyaar inay wadahadal la yeelato Xukuumada ku-meel-gaadhka ee metelaysa Soomaaliya. Waxaan si quman u derisnay dhamaan fursadahayaga, waxaanan la tashiyo iyo wada xaajood la yeelanay qaar ka mid ah daneeyaasha ay khusayso.
Rajo intee le’eg ayaad ka qabtaan inay idiinka soo baxaan wada hadalada dhowaan dhici doona, ma jirtaase xal labaad oo idiin qorshaysan haddii natiijada aad filaysaan ku gaadhi weydaan wada hadalada?
Waxaan dib ugu cadeyn doonaa go’aankii qaranimada Somaliland iyo danahayaga, isla markaana uga raadin doonaa aqbalaad iyo taageero dhinacyo kale.
