Maansada Tusaale waa maanso cusub oo Abwaanka qaranka Xasan Dhuxul Laabsaalax kula dardaarmayo madaxwaynaha cusub ee Jamhuuriyada Somaliland Muddane; Muuse Biixi Cabdi. Maansadan ayaa ah Mid Waano, Hogo-tusaalayn iyo Dardaaran ah oo uu ku socota Madaxwayne Muuse Biixi Cabdi. Abwaanku waxa uu sidoo Abwaanka ayaa maanso Luxdan ku daabacay bartiisa uu ku leeyahay Facebooka waxa uu sare iyo hoos ula dardaarmayaa madaxwayne Muuse Biixi Cabdi oo bulshada Somaliland ka sugayso waxqabad, horumar iyo himilo shacabku mahdiyo. Abwaanka ayaa dhinacyo badan kala hadlay madaxwaynaha haday tahay; Sicir-bararka, lacagta qiime dhacday, oday dhaqameedka, isu duubnida umada Somalialnd, cidhibtirka qabyaalada, iyo tayeynta adeegyada Bulshada. Maansada Tusaale waxay tidhi;-.
Bulsho Aan Tabcanaynin
Oon Turaaabka Dhulkooda
Aan Tamaandho ka Beerin
Oon Tunkooda ku xoogsan
Turuqooda-na maalin
Oon Tireyn Dhididkooda
Oo ku Tiirsan Shisheeye
Oo Talyaanigu Shaadhka
Iyo Tayga u Keeno
Mar hadaad Taladooda
Xilka Tuurta Ku Qaaday .
Hanaan Toosan iftiimi
Dadka Taajka Ku Saaray
Adigay Ku Tuhmeene
Rajadooda Ha Toogan
Riyadooda Ha Tuurin
Hana Tooyan Ciddooda
Ha Takoorin Badhkoodna.
Dadka qaar Tabanaaya
Xaajo toosin u baahan
Hoos U Tooyo Warkooda
Hana Qaadin Talaabo
Bari Hor Hor timaaa
Bulshaadaa kala Taala
Taleex laaskiyo Saylac
Noqo Tiir U Dhaxeeya
Yaan Dhexdooda Tirxaan
Lagu Beerin tashwiishe
Tus Walaalnimadooda
Tafaraaruqna Suuli
Taakulee midka baahan
Tabantaabi Ka Liita
Ha La Waayo Qof Tuuga
iyo Tuugsade Baahan
Bukaan Jiifka ku Taaha
Agoon Taagdaro Hayso
Maati gaajo la Tiicday
Miyi Hooyada taala
Dhalin Suuqyada taagan
Haybta Ruux Ku Takooran
Aday Taakuladaada
Tamar kaa Sugayaane
Taana Maanka Ku Hayso
Musuqmaasaqa Taagan
Ee tandhaafka maraaya
Madaxdoo la Hor taago
Sharciguu Tirmayaaye
Nin islaanta tamaandho
Suuqyadeena la taagan
Shilinkeeda ku Taamay
Oo ka taajiray maati
Ugu tuur hore jeelka
Ha timaado cadaalad
Ha Tanaado dalkeenu
Lacagteena Tasawday
Ku Takooray dalkeeda
ka tageen shacabkeedu
Waa timaado qarsoone
Shilinkeena Tayee.
Adoo taagan Gawaanka
Oo dhaqaale Tabaaya
Nin wuxu ku Taraayay
Marka uu Talinaayo
Ka ahayd u tarsheego
Ama Tuunbaan dheeta
Ka Talaalo hadhawto
Waan Tilmaami karaaye
Kaana Tiisa ha yeelin
Xil ninkaad u Tusmayso
Ku tolayso xasaanad
Reerba yuu dhabar taaban
Salaadiin talo seega
Tunka Sara cumaamad
Talo Reer ku Adeegta
Laabta soo Tumanaaya
Oo siyaasad dhex taagan
Ama xeer ka talaabay
Oo tiraab hanjabaad leh
La soo Taagan I Daacad
Qarankay ku Tunteene
Tus awooda hogaaanka
Hadaad Meelo Tagayso
Ama Booqato tuulo
Yaan wasiiro tun wayn ihi
Tobanaan kor dhaafay
Garbahaaga tubnaan
U tilmaana shaqada oda
Hawsha taala xafiiska
Haku too so dantiisa
Taariikhdaada wanaaji
Yay ku Taaban Dhaliisho
Anigaa wax taraaya
Anaa baahi tiraaya
Dalkaa Taywan la moodi
Laamiyaan U Tusmayni
Tacliintaanu hagaajin
Shuruucdaanu tarbiico
Tuur wixiile ka saari
Ciidankaanu tayayni
Dhaaxo waad tiraabtay
Markii aad tartamaysay,
Buugii Aad Na Tusaysay
Haku tuurin banaane
Taam kayeel balanqaadka
Tacliintii ubadkiisa
Waalidkii ku Tabcaayay
Tag iskuulka Lahaana
Taagna maal u huraayay
Ku tuntuunsaday fiiga
Kol dirays u tolaayay
Toban jaamacad geeyay
Markii uu tamarbeelay
Awlaaduu Tirsanaayay
Mar hadaanay is Tiirin
Shaqo aanay tagaynin
Waa tabaale aduune
Bal inaanay tahriibin
Camalbay tabayaane
Taana maanka ku hayso””::Laabsaalax””::
