“Melez wuxuu ku dedaali jiray in Somaliland gooni isku taagto, laakiin Itoobiyada uu Abiy Madaxda ka yahay waxay doonaysaa in Somaliland iyo Soomaaliya la isku daro…”
Hargeysa (Geeska) – Xildhibaannada Golaha Guurtida Somaliland ayaa Fadhigoodii shalay waxay dood ka yeesheen siyaasadda Arrimaha dibeddu halka ay marayso, isbeddellada ka dhacaya Gobolka Geeska Afrika iyo arrimo kale oo muhiim ah.
Xildhibaannada oo soo bandhigay Aragtiyo kala gedisan oo la xidhiidha siyaasadda Arrimaha dibedda ee Somaliland ayaa intooda badan waxay soo jeediyeen in kor loo qaado dedaallada la xidhiidha horumarinta siyaasadda arrimaha dibedda, maaddaama oo ay tahay ta Somaliland ku xidhaysa dunida inteeda kale.
Xildhibaan Axmed Dirir Cali oo ka mid ah Mudenayaasha dooddaada ka dhiibtay arrintan ayaa si gaar ah diiradda u saaray xidhiidhka Itoobiya iyo Somaliland, isagoo farta ku goday siyaasadda Raysal-wasaaraha cusub ee Itoobiya ee ku waajahan Somaliland iyo Soomaaliya.
Xildhibaanku wuxuu sheegay in Raysal-wasaare Abiy Axmed uu ka shaqanayo sidii dib loogu midayn lahaa Somaliland iyo Soomaaliya, halka Raysal-wasaarihii Geeriyooday ee Itoobiya Melez Sanawi uu ka shaqanayey sidii Somaliland u Madax-bannaanaan lahayd.
Xildhibaan Dirir oo arrimaha ka hadlayaana wuxuu yidhi “Xidhiidhka Jabuuti Iyo Itoobiya wuu wanaagsan yahay, Safaaradana way innaga joogaan, iyagana way innaga joogaan, laakiin waxaad mooddaa Itoobiya xidhiidhkeenii inuu soo yar Qaboobayo..”
Xildhibaanku wuxuu sheegay oo kale “Itoobiyada Maanta iyo tii Melez Sanawi way kala duwan tahay, Melez Sanawi wuxuu ku dedaali jiray in Somaliland gooni isku taagto, laakiin Warar aan hayo Itoobiyada uu Abiy Madaxda ka yahay waxay doonaysaa in Somaliland iyo Soomaaliya la isku daro, laba Tusaale ayaan soo qaadanayaa, mid waa isku daygii uu Abiy Axmed isku dayey inuu halkan (Somaliland) Farmaajo keeno, midna waxa weeyaan arrin Xanaf leh oo ka soo baxday Xeer-ilaaliyaha guud ee Dawladda Itoobiya 27-kii bishii hore, kaasi oo ahaa in Tigreegu doonayaan inay noqdaan sida Somaliland oo kale, Itoobiyana uga dhacdo sida Soomaaliya Dawlad la’aan sharci looga waayay..”ayuu yidhi.
Xildhibaan kale oo ka mid ah Guurtida oo isaguna doodda qayb ka ahaa ayaa soo jeediyey in laga shaqaysiiyo Baasaaboorka Somaliland, si Muwaadiniintu ay ugu Xaji karaan “Waxaynu leenahay Baasaaboor, laakiin Baasaaboorkeenaasi Xajka laguma tago, Waayo? Sucuudiga kama shaqeeyo, Xukuumadda, Wasaaradda Arrimaha dibedda, Safiirka inoo fadhiya Sucuudiga, waxaan u soo jeedinayaa si Shacabka Somaliland u gutaan Waajibaadkooda Diiniga ah haka shaqeeyaan sidii Baasaaboorka Somaliland loogu Xaji lahaa..”ayuu yidhi.
Geeska.net/Hargeisa Office
