Hargeysa(Geeska)-Madaxweynaha Somaliland Md. Axmed Maxamed Maxamuud (Siilaanyo), ayaa shalay Xadhigga ka jaray Dhismaha Cusub ee Wasaaradda Macdanta iyo Tamarta Somaliland, kaasi oo ka kooban Afar Dabaq oo lababa Dhinac yihiin.
Dhismaha Wasaaradda Macdanta iyo Tamarta oo socday Muddo dheer isla-markaana si Casriya loo dhisay, ayaa waxa Xafladda Furitaankiisa ka qayb-galay Madaxweynaha Somaliland Md. Axmed Maxamed Maxamuud (Siilaanyo), Guddoomiyaha Golaha Guurtida Saleebaan Maxamuud Aadan, Guddoomiye ku-xigeennada Koowaad iyo Labaad ee Xisbiga KULMIYE, Wasiirka Macdanta iyo Tamarta Eng. Xuseen Cabdi Ducaale, Wasiirka Deegaan iyo Horumarinta Reer Miyiga Marwo Shukri Xariir Ismaaciil, Wasiir ku-xigeenka Wasaaradda Qorsheynta Qaranka Kayser Cabdillaahi Axmed, Wasiir ku-xigeenka Wasaaradda Warfaafinta Shukri Xariir, Xildhibaan Xaaji Cabdi-waraabe, Masuuliyiin ka socday Shirkadaha Hawlaha Macdan-baadhiseed u jooga Somaliland iyo Marti-sharaf kale.
Wasiirka Wasaaradda Macdanta iyo Tamarta Somaliland Eng. Xuseen Cabdi Ducaale oo ugu horeyn halkaa ka hadlay, ayaa faahfaahiyey Maraaxilkii uu dhismaha Cusub ee Wasaaraddu soo maray, waxaanu yidhi, “Waxaanu ku jirnay Guryihii uu Kotomaadkii dhisay Isticmaarkii. Waxa jirtay in yar oo lagu kordhiyey oo aan Aad u qurux badnayn oo Xukuumadihii naga horeeyay ay dhiseen, markaa waxaanu ku tashanay inaanu Wasaarad Qurux badan dhisno, sababtoo ah Madaxtooyo ayay ka soo horjeeddaa, markaa waxaanu dhisnay Wasaarad bilic ku soo kordhinaysa Halka ay ku taallo iyo Magaaladaba.”
Wasiir Xuseen Cabdi Ducaale, waxa uu ka warramay Cidda ka caawisay dhismahan sida Casriga ah loo dhisay, “Annaga oo ka duulayna in Maaddaama oo Dawladdu ay intaa oo Wasaaradood (dhistay) oo aanay Qasnadda Wax Lacag ahi ku hadhin waxaanu isku daynay inaanu meelo kale wax ka raadinayo. Markaa waxaanu eegnay Shirkadaha Shidaalka ee Heshiiska innagula jooga inaanu waydiisanno inay wax nagala qabtaan (dhismaha cusub ee Wasaaradda Macdanta iyo Tamarta).” Ayuu yidhi, waxaanu intaa ku daray oo uu u Mahad-celiyey Shirkadaha Shidaal-Baadhista oo uu sheegay inay ka caawiyeen Dhaqaalaha lagu hirgeliyey Dhismahan.
Eng. Xuseen Cabdi Ducaale oo hadalkiisa sii wata, Ilaahay ka sakow wuxuu u Mahad-naqay Shirkaddii lahayd Naqshadda Dhismaha Wasaaradda, Shirkadda dhistay iyo Shirkadaha ka shaqeeyay Bilicda Hoose ee dhismaha Wasaaradda, sida Shirkadda ku beertay Dhirta Ubaxa ah, dhirtaas oo kor u qaadday bilicda guud ee Wasaaradda Macdanta.
Sidoo kale, Wasiirku wuxuu tilmaamay in Dhismaha Casriga ah ee loo bineeyay Wasaaraddiisu qayb yar ka tahay Horumarka Xukuumadda Madaxweyne Siilaanyo ku tallaabsatay muddada ay Xukunka Somaliland haysay, “Waxaanu ku tallaabsanay Horumar Ballaadhan, dhismaha Wasaaradda Macdanta iyo Tamartuna wuxuu qayb ka yahay Horumarka Xukuumadda Xisbiga KULMIYE gaadhsiisay Somaliland.” Ayuu yidhi, Wasiir Eng. Xuseen Cabdi Ducaale.
Cabdiraxmaan Siciid Axmed oo ku hadlayey Magaca Shirkadda NAJAX oo hirgelisay dhismaha cusub ee Wasaaradda Macdanta, oo isaguna halkaa ka hadlay, ayaa Wasiirka ku amaanay inuu Farsamo-yaqaannada dhisay Wasaaradda ku daba taagnaa shaqada isla-markaana uu si joogto ah u hubin jiray agabka dhismaha sida Sibidhka iyo wixii kale ee la mid ah, “Wasiirku wuxuu eegayey alaabta aanu dhismaha gelinayno sida Sibidhka oo uu naga hubin jiray” ayuu yidhi, waxaanu intaa ku daray, “Taasi waxay keentay in marka Wasiirku yimaaddo Wasaaradda ay Shaqaaluhu yidhaahdaan Waakan Wasiirkii Foormaanka ahaa.”
Xubin ku hadlayey Magaca Shirkadda RIO oo Nashaqdeysay Dhismaha Wasaaradda Macdanta, ayaa isaguna Munaasibadda ka sheegay, “Waxaanu Nasiib u yeelanay inaanu llaalinno in Nashqadda la raacayo, ILAAHAY Mahaddiina waanu ku guuleysanay.”ayuu yidhi.
Wasiirka Wasaaradda Deegaanka iyo Horumarinta Reer Miyiga Somaliland Marwo Shukri Xaaji Ismaaciil Baandare, oo iyaduna halkaa ka jeedisay hadal kooban oo Munaasibadda ku salaysnaa, ayaa amaantay Dhismaha Wasaaradda Macdanta oo ay tilmaantay inuu bilicsan yahay, “Wasaarado badan baa la dhisay, laakiin Wasaaradda Macdanta iyo Tamarta ayaa kaalinta koowaad qaadday, Waayo? Wasiir Xuseen baa Injineer ah.” ayay tidhi, Wasiirka Deegaanku.
Munaasibaddan oo sidoo kale ay hadallo ka jeediyeen Masuuliyiin ka socday Shirkadaha Shidaal Baadhista ee Gacanta ka geystay Dhaqaalaha lagu dhisay dhismaha Cusub ee Wasaaradda Macdanta, Xildhibaan Xaaji Cabdikariin Xuseen (Cabdi-Waraabe) iyo Dad kale oo Muhiim ah, ayaa waxa Gabogabadii khudbad-dheer ka soo jeediyay Madaxweynaha Somaliland Md. Axmed Maxamed Maxamuud (Siilaanyo), waxaanu yidhi, “Waxaynu ka wada dheregsanahay halka uu dalkeenu marayey (dhaqaale ahaan iyo horumar ahaanba) markii ay Xukuumadda aan gadh-wadeenka ka ahay talada dalka qabatay iyo halka uu maanta dalkeenu marayo marka dhan walba laga eego. Waxa marag ma doon ah in Xukuumaddaydu ay xaqiijisay is-beddel laxaad leh iyo horumar balaadhan oo la taaban karo oo dhinacyo badan leh Kaasoo uu ugu dambeeyey Heshiiskii Casriyeynta iyo Balaadhinta Dekeda Berbera oo Shalay ay kala saxeexdeen dawlada Imaaraadka Carabta iyo Dawlada Somaliland, waana guul u soo hoyatay qarankeenna.
Mudanayaal iyo Marwooyin, Waxa sharaf iyo maamuus ii ah in aan maanta xadhiga ka jaro Dhismahan Bilicda San ee Casriga ah ee loo dhisay Wasaaradda Macdanta iyo Tamarta. Waxaan halkan si mug leh ugu mahad naqayaa Wasiirka Macdanta iyo Tamarta, mudane Xuseen Cabdi Ducaale iyo Shaqaalaha Wasaaradiisa, maadaama ay suurto geliyeen dhismaha ugu quruxda badan dhismayaasha ay ilaa haatan Xukuumaddu yeelato. Waa dhisme tusaale iyo ku dayashaba u ah qaabka casriga ah ee loo baahan yahay in loo dhiso Xarumaha Dawladda.
Wasiirka Macdanta iyo Tamarta waxa kale oo aan uga mahad-celinayaa dedaalka iyo kartida uu muujiyey ee uu Shirkadaha Baadhista Shidaalka ku qanciyey inay inaga caawiyaan Kharashka ku baxaya dhismaha iyo qalabaynta Dhismahan Bilicda San ee Casriga ah, taasoo uu culayskii kaga dulqaaday in ay Xukuumaddu bixiso wixii kharash dhisme iyo qalaba ku bixi lahaa Xarunta Wasaaradda Macdanta iyo Tamarta.
Sidoo kale, waxaan jecelahay in aan iyagana halkan si weyn ugu mahad naqo Shirkadihii Baadhista Shidaalka ee iyagu ajiibay codsigii Wasiirka Macdanta iyo Tamarta, kuwaasoo Xukuumad ahaan naga caawiyey kharshka ku baxay dhismaha iyo qalabaynta Dhismahan Casriga ah ee ay yeelatay Wasaaradda Macdanta iyo Tamarta.
Waxa kale oo aan jecelahay inaan halkan ka bogaadiyo Shirkadda Dhismaha ee NAJAX oo iyagu Xaruntan dhisay iyo Shirkadda Rio Architects oo iyagu lahaa
Naqshadaynta Dhismahan Casriga ah.
Guntii iyo geba-gabadii, Xaruntan loo dhisay Wasaaradda Macdanta iyo Tamartu waxay kor u qaaday Bilicda iyo Quruxda Caasimadda, cid kasta oo gacan ka geysatayna waan uga mahad naqayaa”.
Madaxweynuhu markaasi ka dib, waxa uu Shahaado Sharafyo guddoonsiiyey Masuuliyiin matalayey shirkadaha Shidaal Baadhista, Shirkadaha iska kaashaday fulinta Dhismaha Wasaaradda, isagoo gabogabadiina Wasiirka Macdanta iyo Tamarta Guddoonsiiyey Shahaado Sharaf ay Shaqaalaha Wasaaradda Macdantu ugu talo-galeen Wasiir Xuseen Cabdi Ducaale.
Ugu dambeyn, waxa Xusid Mudan in Maayarka Hargeysa uu Wasiirka Macdanta guddoonsiiyey Shahaado-Sharaf uu sheegay inuu ku muteystay dhismaha bilicda leh ee uu Magaalada ku soo kordhiyey.
