Burco(Geeska)-Ugu yaraan inta la hubo Hal Qof ayaa ku dhaawacmay iska hor'imaad shalay ka dhacay Tuuladda Baliga Diiriye Guuleed oo dhinaca Waqooyi ka xigta Magaalada Burco ,taasi oo ka tirsan Degmadda Kalbare.
Iska hor'imaadkan ayaa dhex-maray Laba maleeshiyo beeleed oo hubaysan oo mudooyinkii u danbeeyay ku muransanaa deegaanka Baliga Diiriye Guuleed ee Waqooyiga Burco ,kuwaasi oo kasoo kala jeeda Beelaha Cabdale Arab iyo Beesha Axmed Faarax ee Habarjeclo.
Ilaa iyo hada si cad looma xaqiijin khasaaraha dhabta ah ee ka dhashay Dagaalkan marka laga tago qofkan dhaawacmay oo goobjoogayaal cadeeyeen. Waxase ay masuuliyiinta gobalka Togdheer iyo odayaal labada dhinac ahi bilaabeen inay xaaladda dejiyaan si aanay arintu faraha uga bixin. Xiisadan ayuu muuqaalkeedu muddooyinkii u dambeeyay muuqday, waxaanay labada dhinac isku hayaan arrimo deegaan.
