Hargeysa (Geeska)- Hay’adda PSI Somaliland, Hay’adda UNICEF iyo Wasaaradda Caafimaadka ee Jamhuuriyadda Somaliland waxa ay si rasmi ah ugu dhawaaqayaan daah-furka barnaamij cusub oo nafaqaynta carruurta ah oo loogu magac daray Super Fariid. Super Fariid waa budo ka samaysan nafaqooyin badan sida fiitamiin A, B, C , D, Foolik Asiidh, Ayroon, iyo Sink. Super Fariid waxa loogu talo galay carruurta da’doodu u dhaxayso 6 bilood ilaa 5 sano. waxaana uu ka caawinayaa ubadka sidii ay u heli lahaayeen nafaqo dhamaystiran. Waxa lagu darayaa cuntada ilmaha maalintii hal mar. Xaflad ballaadhan oo lagu daah-furayo barnaamijka ayaa ka dhacday Xaafadda State House ka ee magaalada Hargeysa, taas oo ay ka soo qayb-galeen marti sharaf badan oo ka kala socotay Wasaaradda Caafimaadka, Hay’adda UNICEF, Hay’adda THET, iyo qaar kale oo badan. Marwo Faaiza Ibraahim Axmed oo ah Madaxa Qorshaynta ee Wasaaradda Caafimaadka ayaa ka hadashay xafladda iyada oo ku dheeraatay muhiimada ay nafaqayntu u leedahay carruurta, iyo sida barnaamijka loogu baahnaa. Waxa ay hay’addaha PSI Somaliland iyo UNICEF uga mahadnaqday sida ay iskaga kaashadeen hirgelinta barnaamijkan.
Dr Ahmed Jama oo ah Madaxa Nafaqada ee Wasaaradda Caafimaadka ayaa isaguna iftiimiyey sida uu barnaamijkan cusub ee nafaqeeyaha Super Fariid uga caawin doono ubadka in ay helaan nafaqo dhamaystiran. Waxa isna meesha ka hadlay Madaxa Xafiiska UNICEF ee Somaliland Dr Awil Haji Gure oo isna ku nuuxnuuxsaday faaidooyinka barnaamijkan cusub ee Super Fariid u keeni doono carruurta Somaliland ee ka yar shan jirka (5 jir). Waxa uu sheegay in uu wax weyn ka tari doono dedaallada loogu jiro in hoos loogu dhigo nafaqadarrada.
Xog Kooban oo ku Saabsan Super Fariid
Super Fariid waa fikrad cusub oo ku waajahan la tacaalidda fitamiinnada iyo macdanaha ku yaraada jidhka
Waa in lasiiyaa carruurta u dhaxaysa 6 bilood ilaa 5 shanadood
Halkii xidhmo Super Fariid ah ee 1 giraam ahi waxay ka kooban tahay xaddiga nafaqo ee loo bahan yahay in la isticmalo oo u dhiganta 15 fiitamiin iyo macdano
Faa’iidooyinka Supr Fariid
Waxa uu kor u qaadaa difaaca jidhka ee ilmaha
Waxa uu kor u qaadaa amateedka ilmaha
Waxa uu kor u qaadaa tamarta ilmaha
Waxa uu kor u qaadaa awooda ilmaha ee xaga waxbarasho iyo garaadkiisaba
Side loo isticmaalaa Super Fariid
Hal xidhmo sii ilma kasta maalinkasta mudo 90 cisho ah
Tusha ka jeex ama ka fur xidhmada
Ku dar dhamaan xidhmada super fariidka cunto la kariyay oo jilicsan
Ku dhex qas budada Super Fariid inta cuntada uu ilmuhu hal mar cuni karo
