“Dulmiyoow na soo dhaaf, dayaxaagii wuu dhacay, digo-rogo habaaroow, dibna hanoogu soo noqon” Qaybtii 2aad
Hargeysa(Geeska)-Akhristayaal, waxaanu halkan idiinku soo gudbinaynaa qaybta labaad ee maansadii uu Abwaan Axmed Aw Geedi habeen hore soo bandhigay,taas oo uu si kulul ugu dhaliilay xukuumadda Somaliland. Maansadaas oo ah mid miisaan suugaaneed leh ayaa soo jiidatay dareenka shacabka. Wuxuu Abwaanku yidhi
Weligii dalaan-dalin
Rabow waxa I daashadey
Dibi gees biciid loo
Marku maalmo doog cuno
Ku durduriya maatida
Iyo daaco good laha
Doxosh waayo qooqiyo
Awr dabar la’aan dhacay
Rabow waxa I daashadey
Marti aad daryeeshoo
Dar illaah u soortoo
Markay diifti reebeen
Reerkii ku duuloo
Maalkii dareersaday
Rabow waxa I daashadey
Damiir beec u yaaliyo
Duul la soo kireystiyo
Daba-gaab ciyaartiyo
Haween tuma durbaankiyo
Guulwadow na daadihi
Raboow waxa I daashadey
Dig dig aan wax tari hayn
Kolba doorashiyo been
Qanjo diid kudkana doon
Nin danliyo durduradii
Rabow waxa I daashadey
Golayaal dihaal qaba
Oo gacalkii doortiyo
Shicibkii dafirayoo
Xaq dabool la jaaloo
Samayihii la diidiyo
Madharaari duubtoo
Oo boqor diqyaanuus
Sandareerada u qabo
Rabow waxa I daashadey
Golayaal distoorkii
Xeerkiyo dadnimadii
Iyo diintii faasaxay
Rawbo waxa I daashadey
Dir cuniyo ruqmo u dirir
Ma qaraare dabato ah
Qawleysatiyo dulin
Dufanliyo afmiishaar
Weeraha dad qaadka ah
Iyo tuug I dala’sada
Ma khajiliyo duuflaal
Iyo reer ma doojaha
Dumarkuun la caytama
Rabow waxa I daashadey
Isku diriyo kala dile
Dab sokeeye nagu shide
Deris nabada kala rare
Dermaduu ku leday gube
Mid wanaaga daaf iyo
U yaqaana daacuun
Xumahana ku diirsada
Rabow waxa I daashadey
Ilmo socodka diinka ah
Midaan daaqsin maqaleed
Waxba looga diraneyn
Dardartana dhegweyn ka ah
Dul yaraana jinac ka ah
Dayro waalidkii ka ah
Danta xoolo moog ka ah
Bacow doobirtana ka ah
Duunka hoose cadow ka ah
Dalqadana cilaan ka ah
Garashada damiin ka ah
Wax u sheegmo didib ka ah
Rabow waxa I daashadey
Nabar aan dawo lahayn
Dalsan aan urshi lahayn
Dar aan oon-tiryo lahayn
Ood aan dudo lahayn
Aqal aan dugsi lahayn
Duqey aan tashi lahayn
Da’yar aan karti lahayn
Duub aan cisi lahayn
Digtoor aan cilmi lahayn
Dayax aan cado lahayn
Dawlis aan side lahayn
Daabad aan hayin ahayn
Ummad aan distooriyo
Dilo khaayin celisiyo
Xakamiyo lahayn dabar
Rabow waxa I daashada
Mid dibnaha ka muumina
Qalbigana ka daalina
Rabow waxa I daashadey
Mid dulmiga xalaashada
Anna iiga sii diga
Mid sinaanta deydaya
Eexdana dugaashada
Mid iftiinka demiye ah
Anna daarada igura
Mid dirsooca muxarima
Isna diirada u sida
Mid wuxuu dalbado hela
Anna tayda duudsiya
Talo waxaad ku deysaa
Hadalkana ku duubtaa
Nin bakhayl damaaciyey
Daahane u fiirsaday
Oo fulayga doqonkii
Daandaansadaan ahay
Anna digasho ma xamilo
Deelqaaf ma qabatimo
Dulinimo ma qaayibo
Waxse biyo ma daadshiyo
Ma dekaame iga dhigay
Waa duruufta lagu jiro
Dantu wey qasbaysaa
Afartaa gu’ darariyo
Dirir seerma wediyo
Sida deyrta halalood
Dooxiyo tayaagaha
Cir dalaala qaadiyo
Waqal iyo daruurtii
Waa duriyo seben hore
Casar weeye dabadii
Oday daan ciroolii
Idihiisa duuda ah
Mayrac u dabaalkii
Dareen lexojeclo u eeg
Lax duleedka lagu cunay
Dacow aaduyoobiyo
Daaligay guduudane
Daymadii ku suuradi
Kuye, dahabo dhoylaay
Durba tebey gabalo-xiis
Duryanyoo cirka isgee
Sida aar dinaahyee
Doobtiyo xunbada saydh
Dirirna isu waaxwaax
Is-difaacday oo tidhi
Ee hoy dugsiiyow
Daalkiyo haraadkiyo
Golcastaad la diidoo
Waad arag daraysee
Duqdu sumaladaasay
Dacalkooda joogtaa
Galbatadan daraadeed
Loo duray min-weynada
Dayadii cuntaa timi
Dacwadana garsoorka ah
Ku te, hadal badooy daa
Dugtooy saaka caarey
Barqo adhi dareerkii
Waataad dayaantee
Hurdo dakharta khuurada
Kaga dananiyaysee
Been lama dilaystee.
La soco……
Ha dan seegin bay tidhi
Adiguna ma duuloow
Calaf dug ma yeeshee
Dabaweyn haddaan cunay
Daayin baa I siiyee
Ha dagaalin oorida
Dalaaqdana ha maqashiin
Darantiyo waraabkiyo
Deegaan u raridiyo
Daaq geynta xoolaha
Adba uma dadaashide
Ha deg dhebin qofkay tidhi
Lama dilo haweenkee
Waxaan uga danleeyahay
Raga meesi loo diray
Daayacay waxoodii
Ka durduurshay bahalaha
Maxay dooda beenta ah
Muran iyo is diidsiin
Hadalka ugu darayaan
Afartaadar maw xidhay
Ma durduushey sida geel
Hormo kalana soo daa
Wuxuu doonayaa gocor
Inuu digo qabowdiyo
Dab bakhtiyey afuufaa
Dakanooyin dhidhiyaa
Dawan cudur istaadhaa
Duufaano kiciyaa
Degelkeena biiyaa
