FBI Oo Baadhaysa Wiilka Uu Trump Soddoga U Yahay

0
21

Baaritaanka FBI-da oo lugaha la soo galay wiil uu sodog u yahay Trump

Baadhitaanada Maraykanka ee FBI ee ku saabsan Ruushka ayaa cagaha la galay Jared Kushner oo ah wiil uu sodog u yahay madaxweyne Donald Trump isla markaana lataliye sare ka ah Aqalka Cad ee looga arrimiyo dalka Maraykanka, sida ay ku warramayso warbaahinta Maraykanku.

Wararku waxay sheegayaan in baadheyaashu ay rumaysan yihiin in uu hayo macluumaad la xidhiidha baadhitaanka ay wadaan, balse aan looga shakisnayn in uu dambi galay.

Hay'adda dambi baadhista ee FBI ayaa baadhaysa in Ruushku uu faragalin ku sameeyay doorashadii Maraykanka ee sanadkii hore ee 2016kii iyo wax xidhiidh ahi in uu dhexmaray iyaga iyo ol'olihii Trump, madaxweynuhuse wuu diiday in uu wax xidhiidh ah la yeeshay Ruushka.

Qareenka Kushner ayaa sheegay in Jared uu gacan ka gaysan doono baadhitaan kasta oo la wado. Saraakiil Maraykan ah oo aan magacooda la sheegin ayaa NBC News u sheegay in arrintan aanay ka dhignay in baadheyaashu ay dambi uga shakiyeen Kushner oo 36 jir ah ama ay doonayaan in ay dacwad ku soo oogaan. Laakiin arrintan ka duwanna wargeyska Washington Post ayaa ku warramay in baadheyaashu ay diiradda saarayaan kulan uu sannadkii hore la yeeshay safiirkii Ruushka ee Maraykanka Sergei Kislyak.

Madaxweyne Trump ayaa xaaladdan ku tilmaamay in ay tahay "khuraafaadkii ugu waynaa ee abid waajahda siyaasi marka laga hadlayo taariikhda Maraykanka.

Laamaha sirdoonka ee dalka Maraykanka ayaa rumaysan in Ruushku uu isku dayay in uu saamayn ku yeesho doorashada Maraykanka uuna gacan siiyo xisbiga Jamhuurig oo ka guulaystay Hillary Clinton oo u sharaxnayd xisbiga dimuqraadiga ah.