Garanye Maanta, oo ah maanso laga tiriyay goobtii lagaga dhawaaqay gooni isu taaga qaranimada somaliland oo ku oo ku beegnayd 18 May, ayaa waxa tiriyay abwaanka caanka ah ee Maxamed Jaamac Warsame Kayd .
Maansadan oo ka hadlaysa duruufihii iyo dhibaatooyinkii loo soo maray gooni isu taaga qaranimada somaliland ayuu abwaanku ku qeexayaa in 18 May aanay ku iman hawl yaraan ee ay ku timi dhiig loo daadiyay iyo maal loo huray. Waxaanu ku bilaabay sidan,
“Rashiidaw gan gaan ahay intaan garanayee joogay
Ninkaygaa cirradu gaamurtee guudka ka cadaaday
Gelin maanta farax lala simaa iima soo geline
Gobonnimada soo hoyotay iyo calanka guudkeena
Galbis iyo mushxaradiyo kalgacal golaha loo xaadhay
Gugaa hooray roobkaa gudladay geediyo ubaxa
Jiilaalkaa guuriyo rucdiga nalaga guud qaaday
Gudcurka iyo cadada kala gurtiyo kalacda waa khayrka
Guryo samaha aan joogna iyo libin ku geeraarka
Sahal laguma gaadhayn hadaan dhiig u gobo’layne
Guunyo iyo naf baa loo huree lama gardaadsheene
Waana guul jahaad lagu dhacsaday gumuc rasaaseede
Markaan allihii nagu galladay mahadnaq gaadhsiiyo
Goorteed xisaab iyo maxkamad lays gar mariyaaye
Intaan wixii ruuxba gayo geliyo diiwaanka
Guhaadaw halkaa aan ku xidho geedigii hore’e
Soo gudub u jeedada haday gob’di joogtaaye
Gobaad hanashadeedaa ka adag hawshi loo galaye
Godloshada xorriyaddiyo calow xeesha garab taala
Gaawaha mar kale loo cushiyo gooshkan marinkeeda
Durba guuxa maan kiyo hadana gacala xiisoodka
Gufaacada qalbiga daacada ah waxa u gawaamaaya
Guunyaha waxaan ka arkayiyo halista gawdiidda
Anoon gudan karayn waajib kay gadefna ii muuqdo
Gocoshada waxaan qabo anoon gabey ku koobaynin
Xilkastaba geyaankii hadii loo tix gelinaayo
Geesigii Hadraawee lahaa dhaadashada gaafkan
Inta ay gadhlaw maqan yihiin Gaariyiyo Qaasim
Waxba yaan murtida gaasirka ah gacan togaalayne
Guntin iga dardaarana anoon ararta gow-gowdhin
Gorfii talada xeer beegtidaa galabta loo dhiibay
Gar bay u igu tahee aan xusuus garashaday taarto
Gole dhexe suldaan iyo garaad guurti iyo culumi
Garaad waayo aragiyo nin door danaha loo gaatay
Guddiyahay la dhaarshee xilkii guudka laga saaray
Hasheedii gudhnaydee wax badan loo gu’ tirinaayay
Waagii gumaystii cadaa looga gacan saydhay
Iyadoo shilkeedii gu’oo godol ku soo joogo
Garan waa ahayd iyo si kale loo gurracayeeba
May gaaso bixin maalintii loo gabood falaye
Waa tii gabraatiyo dhufteen guuto daalin ahe
Waa tii gondaha loogu xidhay geed adaahiya’e
Waa tii ganboor lagu sadee ee ciinka loo guraye
Waa tii gollida lagu maslee godatay maan deeqe
Waa tii ilmadu gabax tidhee gooha dhiidhidaye
Waa tuu xaqlaa Samir gun taday dhaaxo goodiyaye
Waa tii garawshiyo li’i looga dhaar galaye
Goortay xun tahay lama sinee gaar rag baa u le
Gabbaan iyo nin liid maalintuu gees isaga leexday
Ee gocor danaystiyo ka hadhay fulayna soo giigay
Gar gaar eebbe iyo sharaf intuu maalay ganactiisa
Ma gabade halyayaa markaa dhiig u kaacsadaye
Gurmad iyo rogaal wuxuu ahaa guuto iyo weerar
Intuu yaab kasbaday iyo intuu gaystay mahadhooyin
Ee gebi ku caan baxay mar qudha dunida guudkooda
Ama goob xusuus liyo dharaar gunutay taariikhdu
Hadaynaan gafayn waan qabnaa garashadeediiye
Ged gedoonkii waayaha waxay gelinba heer joogtay
Guryo keena maandeeq intay gool kii dhaliyeene
Saddon guuro dabadeed mar kale gaydhe soo hor’e
Gadiid laysu soo baxay wataa guushi loo dhigaye,
Waa se guul cokone Maxamedow fulaye goor dhawe
Guri lagu nagaadiyo hadaan goosi lagu foofin
Goolkiyo hadaan la isku celin gabanta siicaysa
Oon gaabiskiyo laysku wadin gaanihiyo tawlka
Geesaha wax saydhmiyo hadaan goosan laga eegin
Ama garasho jirin geelu waa wabax taraaraaye
Gadaynu nahay baa ka dhigan saaka gabaxawe
Waxaan uga kol leeyahay murtida hadalkiyo gaaban
Gadmashadii horaan weli qabnaa gocashadeediiye
Gef u dhacay is moodsiis shalay mahadhaduu gaystay
Gubashiyo xanuun iyo dhib iyo geeri loo mudaye
Inta hanad galbaday iyo intuu gumucu naafeeyay
Waayeel goblamay iyo intuu gaban agoomoobay
Inta gaari weer loo xidhee guri madaw joogta
Intaan gabadh la sheegaa ka hadhin garan gar meel taalay
Intaan ruux la garanayn halkuu inala soo gaadhay
Inta guunyo mood iyo wax nool galalafkii raacday
Gayigaa burburay ee naftii aragtay giigayso
Ee aan gabbood iyo lahayn guri dhig loo hoydo
Ee maxastii geediga ku timid gubadka hoos jiifto
Een miinadii cidi ka gurin gogosha loo siiyey
Ee aanay gaawiyin suntii ciida lagu gaacshay
Ee godonbiyoodkii dhexyaal giganihii maydku
Ee cudur gumaadiyo u kadan gaajo lagu hoobto
Maatada gawaantay madhnayd lagaga soo guuray
Gacalkiyo hilbaa kala lumee waayo kala geeyey
Een geeridoodiyo is hubin nolol wax soo gaadhay
Ee gabi ka siman baahidiyo guud ahaan tamarta
Een galin xamilin hawl dambiyo gadaw wax loo saaro
Guddiyahay la dhaarshee xilkii guudka laga saaray
Garsoorkaa la qaatiyo shirciga diinta lagu goostay
Galladoodu waa daacadnimo lagu gardaadshaaye
Gadhwadeen isugu baaqay iyo raray u gaadiidda
Gur-gurshaa hayinabay rabtaa gibil madaadsha’ahe
Gocmo wada jiray doonaysaa loo garwaaxsado’e
Gurmad iyo dadaal loo dhanyiyo gees u wada jeede
Gunti giijis ficil iyo dadnimo loo gudboonyahaye
Siday guushu tahay eebbaheen hayna garan siiyo
Gabagabadii maansada waxaan hadal ku soo gaabshay
Go’aankeenu waa tuu ahaa layli goboleeye
Hadba geeba geedka ugu dheer uga garaac doona
Goldoloolo waa badantahee geeskastaba eega
Kuwa garab ku daaqlayniyo gaabiska ilaasha
Ha gadmina kalgawlaha haduu dirir godseek yeesho
Wali gabagabaa lagu jiraa gama ka dheeraada
Lafaa gura guddoonkana ka jira dhaawac godob reeba
Goob kastoo adkaatana rabbaa guulle tala saara
Markastana gafdhawraa jiriyo guurti kuu maqane
I afgaro gufaacada jirkaa galaw ka qayshaaye”
