Madaxweyne Biixi Oo Soo Dhaweeyay Hadal Ka Soo Yeedhay Madaxweyne Farmaajo

29
4167

Hargeysa(Geeska)-Madaxweyne Muuse Biixi Cabdi ayaa shalay la kulmay wefti ka socda hay’adda caalamiga ah ee ICRC.

Madaxweyne Biixi, ayaa sida lagu sheegay warsaxaafadeed ay madaxtooyadu soo saartay waxay weftigan ka wada hadleen xaaladda guud ee dalka, gaar ahaan maxaabiista ay Somaliland ku qabatay Tuko-raq, waxaanu madaxweynuhu soo dhaweeyay hadal dhawaan ka soo yeedhay Madaxweyne Farmaajo. Qoraalka madaxtooyadu soo saartay ayaa u qornaa sidan “Madaxweynaha Jamhuuriyadda Somaliland, Mudane Muuse Biixi Cabdi, waxa uu xafiiskiisa ku qaabiley wefti ballaadhan oo ka socday Guddiga Caalamiga ah ee ICRC oo uu hoggaaminayey Madaxa Guddida Caalamiga ee Laanqeyrta Cas, Mr. Simon Brooks.

Madaxweynaha Jamhuuriyadda Somaliland Mudane Muuse Biixi Cabdi waxa uu xubnaha weftiga warbixin ka siiyey xaaladda guud ee dalka, ka dibna waxa  laga wada hadlay qodobbo dhawr ah oo ay ka mid ahaayeen sidii loo xoojin lahaa xidhiidhka ka dhexeeya Somaliland iyo ICRC, isla markaana ay xafiis uga furan lahayd Somaliland, waxa kale oo laga wada hadlay arrinta maxaabiistii  Soomaaliya ee dagaalka Tuka- raq ay Somaliland ku qab-qabatay, oo ay Somaliland ku ammaaneen siday ula dhaqantay maxaabiistaasi dagaalka iyo sidii xal waara loogu heli lahaa xabbad joojinta dagaalka Somaliland iyo Soomaaliya ku dhexmaray deegaanka Tuka-raq ee gudaha Somaliland.

Waxaanu Madaxweynuhu xubnaha weftiga u sheegay in ay Jamhuuriyadda Somaliland, marwalba maxaabiista si wacan ula dhaqanto, tahayna mid waajib islaamiya iyo mid dhaqanka Somaliland ah, marnabana aanay suurto gelayn in si  xun loola dhaqmo maxaabiista dagaalka, iyadoo taa ka duulaysana Somaliland ay u ogolaatay ehellada maxaabiistaasi inay booqan karaan una yimaadaan.

Dhinaca kale Madaxweynuhu mar uu ka jawaabayey qodob ay ka hadleen weftigu oo ahaa in xabad joojin laga sameeyo Tuka-raq, waxa uu u sheegay in Hadalka ka soo yeedhay Farmaajo ee xabbad joojintu uu yahay tallaabo hore loo qaaday, kana mid ahaa qodobadii Qaramada Midoobay iyo beesha Caalamkuba ay soo jeediyeen in la fuliyo, Somaliland-na dhinaceeda beesha caalamka ay hore uga aqbashay.”

Geesta kale, weftigan ayaa waxay hore u soo mareen magaalada Garowe ee puntland oo ay kula kulmeen madaxweynaha Puntland Cabdiweli Maxamed Cali Gaas. Waxaanay ICRC u muuqataa inay wado dedaal xaaladda Tukaraq lagu dejinayo.

 

LEAVE A REPLY

Please enter your comment!
Please enter your name here