Guddoomiyaha Kulmiye Oo Ka Hadlay Dhimashada Ka Dhacday Dharkayn-geeyo

Published on Jun 05 2016 // Warar

Hargeysa (Geeska)-Gudoomiyaha xisbiga taladda dalka haya  ee Kulmiye Muuse Biixi Cabdi isla markaana ah Musharaxa Madaxweyne ee Xisbiga Kulmiye ayaa baaq nabadeed u diray dadka walaalaha ee ay dagaaladu ku dhex mareen deegaanka Dharkayn-geeye oo ka tirsan gobolka Sool, waxaanu ugu baaqay inay colaada soo afjaraan, oo ay heshiiyaan, waxaanu tacsi u diray dadkii ku geeriyooday iska hor imaadkaas dhexmaray labada beelood.

1

Warsaxaafadeed ka soo baxay Xisbiga Kulmiye oo uu ku saxeexan yahay Guddoomiyaha Kulmiye Muuse Biixi Cabdi, oo nuqul ka mid ahi soo gaadhay Wargeyska Geeska Afrika ayaa u dhiignaa sidan "Waxaan halkan baaq nabadeed uga dirayaa dadka walaalaha ah ee dagaalku ku dhexmaray deegaanka Dharkayn-geeye ee Gobolka Sool in ay joojiyaan colaadda.

Xisbiga KULMIYE wuu ka xunyahay dadka muwaadiniinta ah ee

dhexdeena ku dhintay, waanuna ka tacsiyadaynayaa qoysaska iyo qaranka ay ka baxeen dadka ku naf-waayey shaqaaqadaas oo aynu Alle uga baryeyno inuu u naxariisto, kuwa dhaawacnay uu siiyo caafimaad.

Xisbiga KULMIYE wuxuu dareemayaa xannuunka ay leedahay colaadda sokeeye, sababtoo ah qof kasta oo ku geeriyooda waa ruux ka baxay qaranka Somaliland, waanna kugu dhimay oo kaa dhimay.

Xisbiga KULMIYE wuxuu xasuusinayaa beelaha walaalaha ah ee dagaallamaya in sida diinteena suubbani ina farayso, dadnimada iyo ehelnimaduna tahay in la joojiyo fidmada, wixii dhibaato ahna si miyir-qab iyo nabad ah lagu xalliyo.

Qaran ahaan ummadda reer Somaliland, dawladda, xukuumad ahaan iyo shacbiba, waxa innagu waajib ah in aynu ka gurmano colaaddan oo la kala dhexgalo dhinacyada dagaallamaya si aan dhiig dambe u daadan. Somaliland waxaynu ku soo caano-maalnay in aynu dhibaatooyinkeena ku furdaamino wadahadal, wadatashi iyo isu-tanaasul, maantana waxa innagu waajib ah inaynu dhiigga daadanaya joojino oo dhibaatadu aanay halkaas dhaafin. Sidaas darteed, waxa waajib innagu wada ah in aan rasaas nool la isku adeegsan marka khilaaf yar yimaad, balse, wax kasta ha laga horaysiiyo wanaaga, walaaltinimada iyo in si miyir qab ah loo xasiliyo, iyadoo mar kasta mudnaanta la siinayo ilaalinta nafta qofka bani’aadamka ah".

 

comment closed

Subscribe to our RSS Feed! Follow us on Facebook! Follow us on Twitter! Visit our LinkedIn Profile!