Garabka Dhallinyarada Waddani Oo SONYO Ku Tilmaamay Mid Ay Dhallinyaradu Ku Hungowday

0
578

Hargeysa(Geeska):-Garabka dhallinyarada heer qaran ee xisbiga WADDANI, ayaa shalay si adag u dhalliilay dallada dhallinyarada heer qaran ee  SONYO, waxaana war-saxaafaddeed ay shalay si wada-jir ah u soo saareen ay ku sheegeen in dallada SONYO ay gebi ahaanba ka gaabisay hawlahii wax-qabad ee loo igmaday, iyaga oo tilmaamay in gebi ahaanba ay walaac xoogga ka muujinayaan xaaladda dhallinyarada Somaliland.

War-saxaafaddeedkan oo nuqul ka mid ahi na soo gaadhay, ayaa waxa uu u dhignaa sida tan:

War-Saxaafaddeedkan oo uu ku saxeexnaa Af-hayeenka dhallinyarada Xisbiga Waddani Md.Maxamed Sidiiq Dhamme, ayaa u dhignaa sidan “Dalladii qaran ee dhallinyarada Somaliland waxay noqotay hadhuub shahksiyaad koobani  ku adeegtaan, waxaanay ku milantay siyaasadda  sumaysan ee xukuumadda Kulmiye iyadoo ka leexatay mabaadi’idii guud ee ay u asaasanayd. Fadhiidnimadeeda waxa ka daran leexashada ay ka baydhay jidiikii sooyaalkii hore ay haysay dallada SONYO.

Kalfadhigii 32aad ee golaha sare ee dallada   qodobadii kasoo baxay waxay markhaati u yihiin marin habawga dallada haysta,  war-murtiyeedka dalladu soo saartay maaha mid taabanaaya baylahda iyo xaaladda nololeed ee ay ku jiraan dhallinyarada hoggaankoodu hagraday ee maalin iyo habbeen ku qulqulaaya badaha, iyo balwadaha.  Iyadoo aynu ka wada dhergsanahay xaaladda nololeed ee dhallinyaradu ku suganyihiin waxa nasiib daro ah in maanta SONYO  xasuusan waydo dhallinyaradii ay ahayd inay duruufahooda ka jawaabto. 

Qodobada ay soo saartay Dallada SONYO kalfadhigeedii ugu danbeeyay waxay muujiyeen inay ka fogyihiin waayaha dhabta ah ee dhallinyarada Somaliland ku gedaaman.  Biyo-dhaca qodobadaas oo dul meerayay  Ajnadayaal  aan shaqadoodi ahayn oo ahaa doorkii xukuumaddu qaadanlahayd. Dhallinyar ahaan waxaanu walaac xoogan ka muujinaynaa majare habawga ka muqada dallada SONYO. Qodobada kalfadhigan oo ahaa .

Abaaraha 

Isticmaalka Shillinka Somaliland

Qaadashada Kaadhka Muwaadinka

Tayaynta Waxbarashada

Baaq Ku Wajahan Taageerada Beesha Caalamka 

Doorkii ay ahyd inay qaadto SONYO  oo ahaa isku xidhka dhalinyarada, wacyigelinta dhallinyarada, shaqo abuurka iyo dhiirigelinta dhalliyarada, saddexdii sanno ee ugu danbeeyay waxaad mooda in dalldu aanay hayn hawlihii dhallinyarada ee ahaa mabaadi’deeda oo ay ku milantay siyaasadda Kulmiye ee aany ka badbaadin ururada bulshada rayidka ah. Dhallinyarada Somaliland dallada waxay magan uga yihiin inay ka shaqeeyaan baahiyahooda. 

Waxaanu ku dardaaynaa dallada SONYO In magaceed mabda’eega,iyo  manfaceedu noqdo u  adeegida dhallinyarada oo aanay sii ahaan madal lagu muunad iyo maaldoonto oo madaxtooyada meermeerkedu macno u yahay.

Inay  dalladu daacad ka noqoto xilka qaran ee ay u hayaan dhallinyarada oo ay la dareen wadaagan dhallinyarada u baahan in codkooda lagu hadlo oo laga jawaabo baylahaha kala ba’an ee  ku xeeran mustqablkooda.”